Ғылым бейбітшілік жолында қызмет етеді (мақала)

Ғылым бейбітшілік жолында қызмет етеді – Қаныш Сәтбаевтың публицисттік мақаласы. 1951 жылы «Әдебиет және искусство» (қазіргі «Жұлдыз») журналының 10-санында жарияланған. 50-жылдардың басында халықаралық қатынастардың шиеленісіп кеткені белгілі. Ұлы ғалым бейбітшілік сүйгіш халықтардың жаңа соғыс өртінің туылуына жол бермейтініне бар дауысымен жар сала үн қосады. Соғысқа қарсы күрестің әлемдік деңгейде орасан зор қозғалысқа айналғанын және оның сөзсіз жеңіске жететінін сеніммен баяндайды.

Кеңестік Қазақстанда еңбек сүйгіш және дарынды қазақ халқы, оның көп санды ғалымдар отряды «өздерінің бар күші мен білімін бейбітшілік ісіне, бүкіл прогресшіл адамзаттың игілікті ісіне толық жұмсайтындығында күмән жоқ», - деп түйеді. Өйткені біздің елдегі ғылымның алға қойған міндеті «адамгершіліктің және прогрестің жоғары мақсаттарына қызмет ету, табиғат заңдарын адамның мақсатына бағындыру», — дейді. Мақала кейін Сәтбаевтың 5 томдық таңдамалы еңбектерінің 1970 жылы жарық көрген 5-кітабына, 1989 жылы баспадан шыққан «Ғылым және мәдениет туралы таңдамалы мақалалары» жинағына енгізілген.