Қабанбай батыр көшесі (Алматы)

Қабанбай батыр көшесі(Алматы) Көшеге қазақтардың жоңғар шапқыншылығына қарсы ұлт-азаттық күресін ұйымдастырушыпардың бірі, батыл қолбасшы, Найман тайпасының Қаракерей руынан шыққан, «Хан батыры» атағына ие болған дарабоз тұлға, дау шешетін бітімгер, далалықтар қоғамында сот жұмысын жүргізген әділ би Қаракерей Қабанбай батырдың есімі (Алматы қаласы әкімінің 23.10.1991 №15/398 шешімі) берілген. Қабанбай батыр (1691-1780) - Қазақ жасақтарын басқарып, Сайрам, Ташкент қалаларын, Шығыс Қазақстан аумағын жоңғарлардан азат еткен. Осы уақыт ішінде жаудан туған жерді азат етудегі 103 шайқасқа қатысып, оның бірде-бірінде жеңілген жоқ. Аса қатал жекпе-жектерде 54 қарсыласын жер жастандырған. Көше Медеу, Алмалы және Әуезов аудандарында орналасқан. Шығыстан батысқа қарай Орманов көшесінен басталып, Верещагин көшесіне дейін созылып жатыр. Мұратбаев, Әуезов, Жароков, Радостовец, Розабакиев көшелерін қиып өтеді. Бұрынғы атаулары: Мещанская, Калинин көшелері. Көшенің ұзындығы - 6200 метр. Көше бойында Абай атындағы опера және балет театры (сәулетшілері: Т.Бәсенов, Н.Простаков), оның демалыс аймағында «Қарлығаш» кафесі, ҚР Ғылым академиясының геология институты, «Целинный» кинотеатры, «Алматы» қонақ үйі, «Есік» рестораны, «Астаналық» супермаркеті, «Достық» кітап дүкені, Республикалық шахмат-дойбы клубы, Алматы қалалық медицина колледжі, т.б. орналасқан. Көшедегі опера театрының демалыс алаңында Жамбыл Жабаевтың (мүсіншісі: Х.Б.Наурызбаев, сәулетшісі: М.Меңдіқұлов), М.Әуезовтің (мүсіншісі: Т.Досмағамбетов, сәулетшісі: М.Меңдіқұлов) ескерткіш-бюстері; ал Наурызбай батыр мен С.Сейфуллин көшелерінің арасындағы қарағайлы скверде М.Фрунзенің (мүсіншісі: А.Исаев, сәулетшісі: И.Белоцерковский), Калининнің (мүсіншісі: Х.Наурызбаев, В.Рахманов, сәулетшісі: А.Ордабаев), ескерткіш-бюстері орнатылған.

Абай атындағы Қазақ мемлекеттік академиялық опера және балет театры