Қазақстан Республикасы Сыбайлас жемқорлыққа қарсы іс-қимыл агенттігі

Қазақстан Республикасы Сыбайлас жемқорлыққа қарсы іс-қимыл агенттігі (Сыбайлас жемқорлыққа қарсы қызмет) — Қазақстан Республикасының Президентіне тікелей бағынатын және есеп беретін, Қазақстан Республикасының сыбайлас жемқорлыққа қарсы саясатын қалыптастыру мен іске асыруды және сыбайлас жемқорлыққа қарсы іс-қимыл саласындағы үйлестіруді, сондай-ақ сыбайлас жемқорлық құқық бұзушылықтарды анықтауды, жолын кесуді, ашуды және тергеуді жүзеге асыратын сыбайлас жемқорлыққа қарсы іс-қимыл жөніндегі мемлекеттік орган.

Қазақстан Республикасы Сыбайлас жемқорлыққа қарсы іс-қимыл агенттігі (Сыбайлас жемқорлыққа қарсы қызмет)
Жалпы мағлұмат
Құрылған уақыты	13 маусым 2019 жыл
Оның алдындағы мекемелер	ҚР Мемлекеттік қызмет істері министрлігінің Сыбайлас жемқорлыққа қарсы іс-қимыл ұлттық бюросы (2015-2016) ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің Сыбайлас жемқорлыққа қарсы іс-қимыл ұлттық бюросы (2016-2019)
Мекемені басқарады	Қазақстан Республикасының Президенті
Штаб-пәтері	Астана қаласы, Нұра ауданы, Қабанбай батыр даңғылы, 19, Б блогы
Төрағасы	Асхат Жұмағалиұлы Жұмағали
Ресми сайты
gov.kz/memleket/entities/anticorruption

Тарихы

1998 жылғы 6 мамырда Қазақстан Республикасы Президентiнiң №3935 Жарлығымен Қаржы министрлiгiнiң Салық полициясы департаментi мен Iшкi iстер министрлiгiнiң Экономикалық полиция департаментiнiң негізінде Қаржы министрлiгiнiң Салық полициясы комитетi құрылды. Сол жылы комитет Қаржы министрлiгiнен бөлінген Мемлекеттік кірістер министрлігінің құрамына кірді.

2001 жылғы 22 қаңтарда Қазақстан Республикасы Президентінің №536 Жарлығымен Мемлекеттік кірістер министрлігінің Салық полициясы комитетінің негізінде Қаржы полициясы агенттігі құрылды.

2003 жылғы 23 желтоқсанда Қазақстан Республикасы Президентінің №1255 жарлығымен Қаржы полициясы агенттігіне Ішкі істер министрлігінің экономикалық және сыбайлас жемқорлық қылмыстарды анықтау және тергеу функциялары беріліп, Экономикалық және сыбайлас жемқорлық қылмысқа қарсы күрес жөніндегі агенттігі (Қаржы полициясы) құрылды.

2005 жылғы 25 ақпанда Қазақстан Республикасы Президентінің № 1521 Жарлығымен Экономикалық қылмысқа және сыбайлас жемқорлыққа қарсы күрес агенттігі (Қаржы полициясы) Президентке тікелей бағынышты және есеп беретін мемлекеттік орган болып өзгертілді.

2014 жылғы 6 тамызда Қазақстан Республикасы Президентінің «Қазақстан Республикасының мемлекеттік басқару жүйесін одан әрі жетілдіру жөніндегі шаралар туралы» № 883 Жарлығына сәйкес Мемлекеттік қызмет істері агенттігінің мемлекеттік қызмет саласындағы біртұтас мемлекеттік саясатты іске асыру, мемлекеттік қызметтер көрсету сапасын бағалау және бақылау жөніндегі функциялары мен Экономикалық қылмысқа және сыбайлас жемқорлыққа қарсы күрес агенттігінің сыбайлас жемқорлық қылмыстар мен құқық бұзушылықтардың алдын алу, оларды анықтау, жолын кесу, ашу және тергеу жөніндегі функциялары беріліп, Мемлекеттік қызмет істері және сыбайлас жемқорлыққа қарсы іс-қимыл агенттігі құрылды.

2015 жылғы 11 желтоқсанда Қазақстан Республикасының Мемлекеттік қызмет және сыбайлас жемқорлыққа қарсы іс-қимыл агенттігі Қазақстан Республикасының Мемлекеттік қызмет істері министрлігі болып ұйымдастырылды. Министрлік құрамында Сыбайлас жемқорлыққа қарсы іс-қимыл ұлттық бюросы құрылды.

2016 жылғы 13 қыркүйекте Қазақстан Республикасының Мемлекеттік қызмет істері министрлігі Қазақстан Республикасының Мемлекеттік қызмет істері және сыбайлас жемқорлыққа қарсы іс-қимыл агенттігі болып қайта құрылды. Сыбайлас жемқорлыққа қарсы іс-қимыл ұлттық бюросы агенттік құрылымындағы ведомство мәртебесіне ие болды.

Қазақстан Республикасының Президентінің 2019 жылғы 13 маусымдағы №12 Жарлығымен Қазақстан Республикасының Мемлекеттік қызмет істері және сыбайлас жемқорлыққа қарсы іс-қимыл агенттігінің Сыбайлас жемқорлыққа қарсы іс-қимыл ұлттық бюросы (Сыбайлас жемқорлыққа қарсы қызмет) Қазақстан Республикасының Президентіне тікелей бағынатын Қазақстан Республикасының Сыбайлас жемқорлыққа қарсы іс-қимыл агенттігі (Сыбайлас жемқорлыққа қарсы қызмет) болып қайта құрылды.

Агенттік Қазақстан Республикасының сыбайлас жемқорлыққа қарсы саясатын қалыптастыру мен іске асыруды және сыбайлас жемқорлыққа қарсы іс-қимыл саласындағы үйлестіруді, сондай-ақ сыбайлас жемқорлық құқық бұзушылықтарын анықтау, жолын кесу, ашу және тергеуді жүзеге асыратын құқық қорғау органы болып табылады.

Басшылары

№	Аты-жөні	Басқарған уақыты	Лауазымы
1	Болатбек Ақылбайұлы Бұлғақбаев	1994 — 1996	Қаржы министрлігінің Бас салық инспекциясы жанындағы Салық милициясы (полициясы) басқармасының бастығы
2	Берік Мәжитұлы Имашев	қыркүйек 1996 — сәуір 1997	Мемлекеттік салық комитеті Салық полициясы басқармасының бастығы
3	Әбдiқалық Зәкiрұлы Нәлiбаев	сәуір 1997 — қараша 1997	Қаржы министрлігі Салық полициясы департаментінің директоры
4	Рахат Мұхтарұлы Әлиев	қараша 1997 — қазан 1998	Қаржы министрлігі Салық полициясы департаментінің директоры
		қазан 1998 — қыркүйек 1999	Мемлекеттік кірістер министрлігі Салық полициясы комитетінің төрағасы
5	Сергей Михайлович Кузьменко	қыркүйек 1999 — қаңтар 2001	Мемлекеттік кірістер министрлігі Салық полициясы комитетінің төрағасы
		қаңтар 2001 — 17 қараша 2001	Қаржы полициясы агенттігінің төрағасы
6	Болатбек Ақылбайұлы Бұлғақбаев	17 қараша 2001 — 15 қаңтар 2004	Қаржы полициясы агенттігінің төрағасы
		15 қаңтар 2004 — 20 наурыз 2004	Экономикалық қылмысқа және сыбайлас жемқорлыққа қарсы күрес агенттігінің төрағасы
7	Сарыбай Сұлтанұлы Қалмырзаев	20 наурыз 2004 — 12 желтоқсан 2008	Экономикалық қылмысқа және сыбайлас жемқорлыққа қарсы күрес агенттігінің төрағасы
8	Қайрат Пернешұлы Қожамжаров	12 желтоқсан 2008 — 20 қаңтар 2012	Экономикалық қылмысқа және сыбайлас жемқорлыққа қарсы күрес агенттігінің төрағасы
9	Рашид Төлеутайұлы Түсіпбеков	20 қаңтар 2012 — 6 тамыз 2014	Экономикалық қылмысқа және сыбайлас жемқорлыққа қарсы күрес агенттігінің төрағасы
10	Қайрат Пернешұлы Қожамжаров	6 тамыз 2014 — 11 желтоқсан 2015	Мемлекеттік қызмет істері және сыбайлас жемқорлыққа қарсы іс-қимыл агенттігінің төрағасы
11	Талғат Советбекұлы Донақов	11 желтоқсан 2015 — 13 қыркүйек 2016	Мемлекеттік қызмет істері министрі
12	Қайрат Пернешұлы Қожамжаров	13 қыркүйек 2016 — 11 желтоқсан 2017	Мемлекеттік қызмет істері және сыбайлас жемқорлыққа қарсы іс-қимыл агенттігінің төрағасы
13	Алик Жатқамбайұлы Шпекбаев	11 желтоқсан 2017 — 14 маусым 2019	Мемлекеттік қызмет істері және сыбайлас жемқорлыққа қарсы іс-қимыл агенттігінің төрағасы
		14 маусым 2019 — 16 сәуір 2021	Сыбайлас жемқорлыққа қарсы іс-қимыл агенттігінің төрағасы
14	Марат Мұратұлы Ахметжанов	16 сәуір 2021 — 25 ақпан 2022	Сыбайлас жемқорлыққа қарсы іс-қимыл агенттігінің төрағасы
15	Олжас Абайұлы Бектенов	25 ақпан 2022 — 3 сәуір 2023	Сыбайлас жемқорлыққа қарсы іс-қимыл агенттігінің төрағасы
16	Асхат Жұмағалиұлы Жұмағали	5 сәуір 2023 — бүгінгі күнге дейін	Сыбайлас жемқорлыққа қарсы іс-қимыл агенттігінің төрағасы

Сыбайлас жемқорлыққа қарсы іс-қимыл ұлттық бюросының басшылары

№	Аты-жөні	Басқарған уақыты	Лауазымы
1	Қайрат Пернешұлы Қожамжаров	11 желтоқсан 2015 — 13 қыркүйек 2016	Мемлекеттік қызмет істері министрлігі Сыбайлас жемқорлыққа қарсы іс-қимыл ұлттық бюросының басшысы
2	Талғат Маратұлы Татубаев	28 қыркүйек 2016 — 1 маусым 2018	Мемлекеттік қызмет істері және сыбайлас жемқорлыққа қарсы іс-қимыл агенттігі Сыбайлас жемқорлыққа қарсы іс-қимыл ұлттық бюросының басшысы
3	Қайрат Иматұлы Сұнтаев	1 маусым 2018 — 14 маусым 2019	Мемлекеттік қызмет істері және сыбайлас жемқорлыққа қарсы іс-қимыл агенттігі Сыбайлас жемқорлыққа қарсы іс-қимыл ұлттық бюросының басшысы

Қарамағындағы мекемелер

• Агенттіктің облыстар мен Алматы, Астана, Шымкент қалалары бойынша департаменттері

Ведомстволық марапаттар

Қазақстан Республикасы Президентінің 2011 жылғы 30 қыркүйектегі «Мемлекеттік рәміздер және Қазақстан Республикасының Президентіне тікелей бағынатын және есеп беретін кейбір мемлекеттік органдардың, Қазақстан Республикасы Конституциялық Кеңесінің, құқық қорғау органдарының, соттардың, Қарулы Күштердің, басқа да әскерлер мен әскери құралымдардың ведомстволық және оларға теңестірілген өзге де наградаларының геральдикасы мәселелері туралы» № 155 Жарлығына сәйкес Сыбайлас жемқорлыққа қарсы іс-қимыл агенттігінің (Сыбайлас жемқорлыққа қарсы қызмет) ведомстволық наградалары болып келесілер қарастырылады:

• Медальдар:
  • [1](қолжетпейтін сілтеме) I, II, III дәрежелі «Мінсіз қызметі үшін»;
  • [2](қолжетпейтін сілтеме) «Құқық тәртібін қамтамасыз етуге қосқан үлесі үшін».
• Төсбелгілер:
  • I, II дәрежелі «Үздік қызметкер»;
  • I, II дәрежелі «Үздік қызметші».

• 
  1 дәрежелі «Мінсіз қызметі үшін» медалі
• 
  2 дәрежелі «Мінсіз қызметі үшін» медалі
• 
  «Құқық тәртібін қамтамасыз етуге қосқан үлесі үшін» медалі