Қазақстан Республикасы Төтенше жағдайлар министрлігінің Өнеркәсіптік қауіпсіздік комитеті

Қазақстан Республикасы Төтенше жағдайлар министрлігінің Өнеркәсіптік қауіпсіздік комитеті — өнеркәсіптік қауіпсіздік саласындағы басшылықты жүзеге асыратын Қазақстан Республикасы Төтенше жағдайлар министрлігінің ведомствосы.

Қазақстан Республикасы Төтенше жағдайлар министрлігінің Өнеркәсіптік қауіпсіздік комитеті
Жалпы мағлұмат
Мемлекет	Қазақстан
Құрылған уақыты	20 қазан 2020 жыл
Штаб-пәтері	010000, Астана қаласы, "Байқоңыр" ауданы, Янушкевич көшесi, № 2 үй
Ресми сайты
gov.kz/memleket/entities/kpb?lang=kk

Тарихы

1996 жылы ҚР Өнеркәсiпте жұмысты қауiпсiз жүргiзудi қадағалау және кен қадағалау жөнiндегi комитетi ҚР Төтенше жағдайлар мемлекеттiк комитетiне қосылды. 2004 жылы ҚР Төтенше жағдайлар министрлігінің Төтенше жағдайлар саласындағы мемлекеттiк бақылау және қадағалау комитетi құрылды. 2006 жылы ол екіге бөлініп, Өртке қарсы қызмет комитеті мен Төтенше жағдайларды және өнеркәсiптiк қауiпсiздiктi мемлекеттiк бақылау комитеті құрылды. 2014 жылы комитет таратылып, ҚР Инвестициялар және даму министрлігінің Индустриялық даму және өнеркәсіптік қауіпсіздік комитеті құрылды. 2018 жылы комитет ҚР Индустрия және инфрақұрылымдық даму министрлігіне беріліп, 2020 жылы ҚР Төтенше жағдайлар министрлігінің Өнеркәсіптік қауіпсіздік комитеті және ҚР Индустрия және инфрақұрылымдық даму министрлігінің Индустриялық даму комитеті болып екіге бөлінді.

Міндеттері

1. Өнеркәсіптік қауіпсіздік саласындағы мемлекеттік саясатты қалыптастыру және іске асыру
2. Қауіпті өндірістік объектілердегі авариялар, оқыс оқиғалар кезінде туындайтын қауіпті өндірістік факторлардың зиянды әсерінің алдын алу, өнеркәсіптік қауіпсіздік саласындағы мемлекеттік қадағалауды қамтамасыз ету

Құрылымы

Комитеттің 7 басқармасы бар (2023 жылға):

1. Мұнай-газ өнеркәсібіндегі мемлекеттік бақылау және қадағалау басқармасы
2. Тау-кен металлургиясы өнеркәсібіндегі мемлекеттік бақылау және қадағалау басқармасы
3. Қауіпті техникалық құрылғылардың қауіпсіз пайдаланылуын мемлекеттік қадағалау басқармасы
4. Талдау, жоспарлау және мемлекеттік көрсетілетін қызметтер басқармасы
5. Салааралық бақылау және қадағалау басқармасы
6. Қаржы және әкімшілік жұмыс басқармасы
7. Кадр және ұйымдастыру-бақылау жұмысы басқармасы

Қарамағындағы мекемелер

• Комитеттің облыстар мен Алматы, Астана, Шымкент қалалары бойынша департаменттері