Қазақстан — Сауд Арабиясы қатынастары

Дипломатиялық қатынастар

Қазақстан Республикасы мен Сауд Арабиясы Королдігі арасындағы дипломатиялық қатынастар 1994 жылғы 30-сәуірде орнатылды. Қазақстанның Рияд қаласындағы Елшілігі 1995 жылғы 13-желтоқсанда ашылды. 2007 жылғы 28-желтоқсаннан бастап ҚР Жидда қаласындағы консулдығы жұмыс істеп келеді. САК-тың ҚР-дағы Елшілігі 1997 жылғы наурыздан бастап жұмыс істейді. Сауд Арабиясы Королдігі араб және мұсылман мемлекеттерінің алғашқыларының қатарында болып 1991 жылғы 30-желтоқсанда Қазақстанның тәуелсіздігін мойындады. Екі мемлекет арасындағы ынтымақтастықтың негізі ҚР Президенті Н.Ә.Назарбаевтың 1994 жылы Сауд Арабиясына жасаған ресми сапары барысында қаланды.

Шарттық құқықтық база

Қазақстан-сауд келісімдер базасы түрлі сипаттағы 14 құжаттан құралады (мемлекетаралық шарттар, үкіметаралық және ведомствоаралық келісімдер, протоколдар мен меморандумдар).

Сауда-экономикалық ынтымақтастық

2015 жылғы сауда айналымының көлемі 16,3 млн. АҚШ долларын құрады (экспорт – 5,4 млн. импорт – 10,9 млн. доллар). 2014 жылғы көрсеткіш 13,4 млн. доллары құраған болатын (экспорт – 1,6 млн. импорт – 11,8 млн. доллар). Ал, 2013 жылғы сауда айналымының көлемі 29 млн. АҚШ доллары деңгейінде болған (экспорт – 3,6 млн. импорт – 25,4 млн. доллар). Сауд Арабиясының 2005-2015 жылдар аралығында Қазақстанға жасаған инвестициясының көлемі 85 млн. АҚШ доллары. Қазақстаннан Сауд Арабиясына негізінен арпа, темір немесе легірленбеген болаттан жасалған тегіс илек, түрлі құрал-жабдықтар экспортталады. Ал Сауд Арабиясынан Қазақстанға мотор майлары, басқа да өнеркәсіптік мақсаттарда пайдаланылатын майлар, бояулар мен лактар және т.б. кіргізіледі.

Мәдени-гуманитарлық ынтымақтастық

2009 жылғы 24-31 қазан аралығында Қазақстанның мәдени күндері Сауд Арабиясында өтсе, Сауд Арабиясының ұқсас шарасы 2010 жылғы 1-5 маусымда Қазақстанда ұйымдастырылды. Өткен кезеңде екі елдің жоғары оқу орындары арасында академиялық қатынастар орнатылды. Атап айтқанда, Қазақстанның жоғары оқу орындарының басшылары мен өкілдері Сауд Арабиясында бірнеше рет сапармен болып, САК жоғары оқу орындарының оқу жоспарларымен және әдістемелік жұмыстарымен танысты және білім мен ғылым саласындағы ынтымақтастықты одан әрі дамытуға уағдаласты.