Қазақстан — Сирия қатынастары

Қазақстан — Сирия қатынастары — Қазақстан Республикасы мен Сирия Араб Республикасы арасындағы қатынастар

Дипломатия

Қазақстан Республикасы мен Сирия Араб Республикасы арасындағы дипломатиялық қарым-қатынастар 1992 жылғы 28 наурызда орнатылды.

Қазақстан мен Сирия арасындағы өзара қатынастарға қазіргі уақытта еліміздің Иорданиядағы Елшілігі жетекшілік етеді. 2007 жылғы сәуір айынан бастап Дамаск қаласында Қазақстанның Консулдығы жұмыс істейді. Консул- А.Жабаш.

Ынтымақтастық

2007 ж. қарашада Қазақстан Президенті Н.Назарбаевтың Дамаскіге жасаған алғашқы ресми сапары екі ел арасындағы түрлі салалардағы ынтымақтастықты жандандыруға елеулі серпін берді.

Сапар қортындысы бойынша Қазақстан Сыртқы істер министрлігі мен САР Сыртқы істер министрлігі арасындағы саяси консультациялар жөніндегі Декларацияға, Қазақстан Үкіметі мен САР Үкіметі арасындағы Білім және ғылым саласындағы ынтымақтастық жөніндегі келісімге, Қазақстан Ауыл шаруашылығы министрлігі мен САР Ауыл шаруашылығы министрлігі арасындағы Өзара түсіністік, сондай-ақ Астана мен Дамаск арасындағы әріптестік қарым-қатынастар орнату меморандумдарына қол қойылды. Сапар шеңберінде Қазақстан-Сирия Іскерлік кеңесінің бірінші отырысы өткізілді.

Қазақстанға САР бұрынғы Сыртқы істер министрі Фаруқ Шарааның (1992 ж. наурыз), САР Экономика және сауда министрі А.Лютфидің (2005 ж. тамыз), Сирияның қазіргі Сыртқы істер министрі Уалид әл-Муаллимның (2007 ж. қыркүйек) сапарлары болды.

Өткен жылдары Сирияда Қазақстан Парламенті Мәжілісінің Төрағасы Ж.Тұяқбай (2004 ж. маусым), Қазақстан Мәдениет, ақпарат және қоғамдық келісім министрі М.Құл-Мұхаммед (2003 ж. мамыр), Қазақстан Республикасы Мәдениет және ақпарат министрі Е.Ертісбаев (2006 ж. маусым), Қазақстан Республикасы Индустрия және сауда министрі Ғ.Оразбақов (2007 ж. шілде) болып қайтты.

Мәдени байланыс

Екі елдің мәдени саласында Дамаскіде жерленген қазақ халқының көрнекті ұлдары – ғалым, ойшыл Әбу Наср Әл-Фараби мен Мысыр менСирияның ХІІІ ғасырдағы билеушісі Сұлтан Аз-Захир Бейбарыстың тарихи мұраларына қатысты тақырып ерекше орын алады.

2007 ж. қазанда Қазақстан Үкіметі мен САР Үкіметі арасында Дамаск қаласында Әл-Фарабидің тарихи-мәдени орталығының және кесенесінің құрылысын салу, Сұлтан Аз-Захир Бейбарыс кесенесін қалпына келтірудегі ынтымақтастық туралы келісімге қол қойылды. Келісімге сәйкес, Қазақстан Үкіметі Әл-Фарабидің тарихи-мәдени орталығының және кесенесінің құрылысын салуға 29,6 млн. теңге және Сұлтан Аз-Захир Бейбарыс кесенесін қалпына келтіру құрылысына 54,2 млн. теңге қаражат бөлді.

Сауда

Екі ел арасындағы тауар айналымы 2010 жылы 8,9 млн. АҚШ долл. құраса (негізінен экспорт), 2011 жылы 5,772 млн. АҚШ долларға жетті (экспорт – 3,19 млн. АҚШ долл., импорт – 2,58 млн. АҚШ долл.).