Қазақ әдебиеті мен өнерінің күндері, апталығы мен онкүндіктері

«Қазақ әдебиеті меи өнерінің күндері, апталығы мен онкүндіктері» — әдебиет пен өнер саласындағы жетістікті корсететін мәдени-көркем шаралар.

Қазақ әдебиеті мен өнерінің алғашқы онкүндігі 1936 жылы Мәскеу қаласында өткен. Онкүндік кезінде қазақтың мемлекеттік музыкалық театры Е. Г. Брусиловскийдің "Қыз Жібек", "Жалбыр" операларын, Ахмет Қуанұлы Жұбанов басқарған ұлт аспаптар оркестрі бірнеше концерттер қойды.

Қазақ әдебиеті мен өнерінің 2-онкүндігі 1958 жылы өткен. Бұл онкүндікте Опера және балет театры М.Төлебаевтың "Біржан - Сара", Жұбанов пен Л. А. Хамидидің "Абай" операларын, Н.Тілендиев, Л. Б. Степанов және Е. В. Манаевтын "Достық жолмен", Б.В. Асафьевтің "Бақшасарай фонтаны" атты балеттерін, Қазақ драма театры Мұхтар Омарханұлы Әуезовтің "Еңлік-Кебегін", С.М. Мұқановтың "Шоқан Уәлихановын", Ғ.М. Мүсіреповтің "Ақын трагедиясын", Ә.Тәжібаевтың "Жалғыз ағаш орман емесін", У.Шекспирдің "Асауға тұсауын"; Орыс драма театры Н.И. Ановтың "Мұрагерлерін", т.б. спектакльдерін қойды. Оған сонымен қатар Халық аспаптар оркестрі (бас дирижері - Ш.С. Қажығалиев), филормонияның ансамбльдері, Мемлекеттік хор капелласы (жетекш. - Г.Е. Виноградова), Мемлекеттік ән-би ансамблі, т.б. қатысты.

Олардан басқа 1949 жылдан бері - қазақ әдебиетінің Мәскеу онкүндігі (1949), қазақ әдебиеті мен өнерінің Армениядағы (1968), Өзбекстандағы (1971) онкүндіктері және ҚР-ның Мәскеуде өткен күндері (1967, 1977), қазақ әдебиетінің Ленинградтағы күндері (1977), қазақ әдебиеті мен өнерінің Ресейдегі (1982), Якут АКСР-індегі (1983), Ленинградтағы (1988) күндері болып өтті.