Қазхиммонтаж холдинг

Қазхиммонтаж холдинг - 1976 жылдың 20 желтоқсанында құрылған ашық акционерлік қоғам. Негізгі жұмыс түрлері: нысандарды пайдалануға дайын күйде салып беру; жұмыс жасаудың жобалық-сметалық құжаттамасын және жобасын жасақтау; құрылыс және технологиялық металл конструкцияларын, сыйымдылығы 50 000 текше метрге дейінгі қорқоймаларды жобалау, дайындау, жеткізіп беру және монтаждау, арналық газ- мұнай құбырлары мен су құбырларын тарту; тұрғын үйлер салу, жер қазу, жалпылама құрылыс және әсемдеу жұмыстарын орындау; "Қазхиммонтаж холдинг" ашық акционерлік қоғамының қатынасуымен Қызылорда облысындағы Құмкөл, Ақшабұлақ кенорындарын, Ақтөбе облысындағы Лақтыбай, Маңғыстау облысындағы Дұңға кенорындарын жайластыру шаралары жүзеге асырылды, Құмкөл, Қаламқас, Жаңа өзен мұнай кенорындарында болаттан жасалған мұнай қорқоймаларын монтаждау жұмыстары жүргізілді. Бұл акционерлік қоғам диаметрі 1 200 мм-лік Ташкент - Бішкек - Алматы газ құбырын, диаметрі 1 400 мм-лік Ертіс - Карағанды су құбырын, Атырау облысындағы диаметрі 1 400 мм-лік, ұзындығы 42,8 км САЦ-4 газ құбырын (лупинг), Кеңқияқ - Атырау мұнай құбырын тартуға қатынасты. Қазақстан Республикасы Үкіметінің қаулысымен "Қазхиммонтаж холдинг" ашық акционерлік қоғамы 2003 жылы Жамбыл облысындағы Амангелді газ кенорнын орнатудың және оның инфрақұрылымын тұргызудың бас мердігері болып тағайындалды.