ҚазҰУ ақсақалдар кеңесі

Тарихы

Ғибраты, берері мол Ақсақалдар кеңесі 2010 жылы желтоқсанда университет тарихында ректор, академик Ғ.Мұтановтың бастауымен құрылды. Әл-Фараби атындағы Қазақ Ұлттық университетінің қоғамдық өмірінің және ғылыми, оқу үдерісінің өрістеуіне бағытталған бұл Ақсақалдар кеңесі аз уақыттың ішінде беделді ұйымға айналды. Ажарлы алқалы кеңес университет ректорының оң қанаты болып, келелі мәселелерді талқыдан өткізіп, заман ағымының жылдам ағысы, айдынына бетбұрды. Ақсақалдар кеңесін Қазақстан Республикасы ғылымдарна еңбегі сіңген қайраткер, заң ғылымдарының докторы, профессор Сұлтан Сартайұлы басқарады. Сексеннің сеңгірінен асып кетсе де ұстаздық тәжірибесі теңіз толқынындай тасыған аса құрметті Ардагерлер, Ақсақалдар кеңесінің төрағасы осы күнге дейін орнықты ойдың, ізгілікті істердің тағынан түспей қоғамдық, ғылыми, азаматтық жұмыстардың жуан ортасында жүреді. Белгілі қоғам қайраткері, заңгер Сұлтан Сартаевтың орынбасары - Қазақстан Республикасы Мемлекеттік сыйлығының және Қ.Сәтбаев атындағы сыйлықтың лауреаты, доктор, профессор Зұлхайыр Аймұхаметұлы Мансұров болып табылады. З.Мансұровтың есімі ТМД елдерінде және шетелдерге кеңінен таныс. Танымал химик-ғалым Шығыс пен Батыстың талай мемлекеттерінде болып, халықаралық ғылыми-теориялық конференцияларда байсалды баяндамалар жасап, Тәуелсіз Қазақстанның ғылымдағы туын абыроймен көтеріп келеді.  Ал енді осы келелі кеңестің құрамында профессорлар Ғ.Жұматов, Т.Кәкішев, Ө.Күмісбаев, К.Қожахметов, С.Оспанов, У.Шалекенов, Ә.Ыдырысов, Х.Оспанов, М.Шығаева секілді ҚазҰУ-дың шапағатты шаңырағын көтеріп келе жатқан тарихшылар, химиктер, биологтар, филологтар бар. Ақсақалдар кеңесінің мүшелері қоғамдық маңызы зор мәселелерді талқылауды, ҚазҰУ-дағы куратор-эдвайзерлермен бірігіп, белді-белді іс-шараларды атқаруға қатысып отырады, атақты ғалымдармен студенттердің кездесулеріне профессор-ұстаздардың ашық сабақтарын өткізуге қатысады. Сөйтіп, бүгінгі заман талабына сай жас білікті мамандарды тәрбиелеу, әзірлеу істеріне игілікті үлестерін қосады.  Елбасымыз зерттеу университеттерін қалыптастыру, жаңа технологиялармен байланысқан білім мен ғылымның нәтижесіне қол жеткізуге үндеп отыр. Бұл салада Оксфорд, Кембридж, Қытай университеттерінің деңгейіне жетуіміз керек, университет рейтингке кіру керек, зерттеулер - инновацияларға айналу қажет. Бұл салада ҚазҰУ алдыңғы сапта әзір тұр. Өндіріске жақсы жобалар ұсынған өте орынды болмақ. Гуманитарлық арнаны алға апаруды ұмытпауға тиіспіз. Қазіргі ұрпаққа қазақ тілін, қазақ тарихын, Абайды тереңдетіп беруге тиіспіз. Сонымен, ҚазҰУ-ды бүкіләлемдік деңгейге көтеруге міндеттіміз. Осы іспеттес күрделі де күретамыр жайларға Ақсақалдар кеңесінің мүшелері өз пікірлерін қосып, ұсыныстар жасап отырады. Тәуелсіз Қазақстанның 20 жыл толуына орай университетте 20 инновация жоспарының нәтижесі талқыланды. Оқытушының корпоративті мәдениет кодексі, Студенттердің ар-намыс кодексі, ҚазҰУ оқытушысы туралы ереже, ҚазҰУ студенті туралы ереже, ҚазҰУ-дың әр студенті оқитын 100 әдеби шығарманың тізімі, т.б. құжаттарды Кеңес әзірлеп бекітті. Мінеки, атқарылып жатқан игілікті шаруалардың басы-қасында Ақсақалдар кеңесінің мүшелері де жүр. Олар жатақханаларда, факультеттерде студенттермен кездесулер ұйымдастырады, университеттегі үгіт-насихат жұмыстарына тартылады, өздері ашық сабақтар, дәрістер өткізеді.  Айта берсе Ақсақалдар кеңесінің университет өмірінде араласпайтын саласы жоқ. «Кеңесіп пішкен тон келте болмас» деген нақыл бар. Аласапыран, жаһандану заманында алқалы Ақсақалдардың ақылдары жас ұрпақтың буынын қатайтып, тәуелсіз еліміздің келешегін жасауға жарқын үлестерін қосатынына шек жоқ. [[1]]

Ақсақалдар кеңесі туралы ереже

I. Жалпы ережелер   1.1. Әл-Фараби атындағы ҚазҰУ Ақсақалдар кеңесі университет ректоры жанынан университеттің ғылыми және қоғамдық өмірінің, оқу қызметінің дамуына бағытталған, ректордың тапсырмалары бойынша ұсыныстарды әзірлеу және қоғамдық маңызы зор мәселелерді  талқылау мақсатындағы қоғамдық-кеңесші алқа (орган) ретінде құрылады.  1.2. Ақсақалдар кеңесінің құрамына университеттің Ардагерлер кеңесінің аса белсенді мүшелері және беделді әрі тәжірибелі ғалымдары, білім мен ғылым саласына айрықша еңбек сіңірген тұлғалар кіреді. 1.3. Ақсақалдар кеңесі жоғарыда көрсетілген мәселелер бойынша Ақсақалдар кеңесінің, Ғылыми кеңестің және әл-Фараби атындағы ҚазҰУ әкімшілігінің бастамасы бойынша мәселелерді қарастырып, өз ұсыныстарын шығарып, оларды шешім қабылдау үшін ректорға, Ғылыми кеңеске ұсынады. 1.4. Ақсақалдар кеңесінің жалпы басшылығын Ақсақалдар кеңесінің төрағасы атқарады, төраға болмаған жағдайда оның орынбасары басқарады.     II. Ақсақалдар кеңесінің құзіреті 2.1.        Ақсақалдар кеңесінің: - әл-Фараби атындағы ҚазҰУ-дың кеңесші-профессоры лауазымына кандидатура ұсынуға; - «Әл-Фараби атындағы Қазақ ұлттық университетінің дамуына қосқан айрықша үлесі үшін үлкен алтын медаль», «Әл-Фараби атындағы Қазақ ұлттық университетіне сіңірген ерен еңбегі үшін» (күміс медаль) медальдарымен марапаттау туралы ұсыныс беруге; - ҚазҰУ-дың беделді ғалымдарының меретойларына орай «Өнегелі өмір» кітаптар топтамасын шығару туралы ұсыныстар беруге; - университет ғалымдарының ғылыми зерттеулерді, оқу-тәрбие үдерісін ұйымдастыру мәселелері бойынша ұсыныстарын жинақтап, сараптап, оларды ректордың, Ғылыми кеңестің қарауына ұсынуға; - университеттің әлеуметтік-экономикалық, құқықтық, қоғамдық-саяси даму мәселелерін талқылауға және қарастыруға, сондай-ақ ҚР қолданыстағы заңнамасына және әл-Фараби атындағы ҚазҰУ Жарғысына қайшы келмейтін басқа да мәселелерді қарастыруға құқы бар. 2.2 Ақсақалдар кеңесінің мүшелері факультеттегі ректордың өкілдері болып табылады және оның қоғамдық көмекшісі ретінде:  - бекітілген тәртіп бойынша мәжілістік және кеңестік органдардың жұмысына қатысуға, факультетте өткізілетін жиналыстарға және басқа да шараларға қатысуға; - факультеттің лауазымды тұлғаларынан өз қызметіне қажетті материалдарды сұрауға құқы бар. 2.3 Ақсақалдар кеңесінің мүшесі міндетті: - Ақсақалдар кеңесінің қызметіне белсенді қатысуға; - ректордың және Ақсақалдар кеңесінің мәжілістерде берілген тапсырмаларын орындауға.   2.4. Ақсақалдар кеңесі университеттің басқа қоғамдық ұйымдарымен Ардагерлер кеңесімен, кәсіподақ ұйымдарымен, жастар ұйымдарының комитетімен және т.б.тығыз байланыста жұмыс істейді.    ІІІ. Ақсақалдар кеңесі қызметінің жұмыс тәртібі   3.1. Ақсақалдар кеңесінің мәжілісі екі айда бір рет өткізіледі. 3.2. Ақсақалдар кеңесі мүшелерінің мәжілісіне қатысушылардың көпшілік дауысымен шешім қабылданады. 3.3. Ақсақалдар кеңесінің шешімі міндетті түрде ректорға хабарланады және ол ұсыныстық сипатта болады. 3.4. Жұмыс тобының мәжілісі қажет болған жағдайда немесе ректордан сәйкес тапсырма алынған жағдайда өткізіледі. 3.5. Жұмыс тобы мүшелерінің мәжілісінде оның мүшелерінің басым көпшілігінің дауыс беруімен қабылданған шешімдер Ақсақалдар кеңесінің қарауына ұсынылады немесе Ақсақалдар кеңесінің төрағасы университет ректорына жібереді.  3.6. Ақсақалдар кеңесінің төрағасы: - Ақсақалдар кеңесі қызметінің жоспарын бекітеді; - Ақсақалдар кеңесінің құрамына қабылдау және шығару туралы ректорға ұсыныстар жасайды; - Ақсақалдар кеңесі жұмыс тобының қызметін үйлестіреді; - Ақсақалдар кеңесі мәжілістерін өткізеді.     IV. Ақсақалдар кеңесі туралы ереже қабылдау және оған өзгерістер мен қосымшалар енгізу   4.1.  Осы ережені Кеңес құрамына енген барлық мүшелер қарастырады және Ережені ректор бекітеді. 4.2.  Ережеге мүшелердің ұсынысы бойынша өзгерістер мен толықтырулар енгізілуі мүмкін. Өзгерістер мен толықтырулар енгізу мәжілістерде жүзеге асырылады және аталған ұсыныс бойынша дауыс беру және талқылау сол мезетте өткізіледі. Осы Ережеге өзгерістер мен толықтырулар енгізу жалпы мүшелер санының екіден бірі «қолдап» дауыс бергенде қабылданды деп есептеледі.       V. Ақсақалдар кеңесі қызметінің тоқтатылуы   5.1.  Кеңес қызметі оның мүшелерінің жалпы санының екіден үш бөлігі дауыс беріп, сәйкес шешімнің қабылдануымен тоқтатылады. 5.2.  Қызметтің тоқтатылуы туралы шешім қабылдау туралы бастаманы Кеңестің кез келген мүшесі көтеруі мүмкін, бірақ ол өз ұсынысының нақты негіздерін көрсетуі тиіс.

Ақсақалдар кеңесі мүшелері

Әбділдин Мейірхан Мүбәрәкұлы  - физика-математика ғылымдарының докторы, профессор, ҚР ҰҒА академигі Кәкішұлы Тұрсынбек  - филология  ғылымдарының докторы,  профессор, ҚР ғылымына еңбек сіңірген қайраткері, Халықаралық  жоғарғы мектептер академиясының Құрметті академигі Жұматов Ғаббас Жұматұлы – Ұлы Отан соғысының ардагері, тарих ғылымдарының кандидаты, профессор, Қазақстанның еңбек сіңірген қайраткері, университеттің  Ардагерлер кеңесінің төрағасы Оспанов Хабибулла Кұсайынұлы - Еңбек майданына қатысушы, химия ғылымдарының докторы, профессор, Халықаралық минералды ресурстар академиясының академигі, Жалпыұлттық  тәуелсіз «Платиналы Тарлан»  сыйлығының лауреаты Ни Валентин Хаксунович - Еңбек майданына қатысушы, физика-математика ғылымдарының докторы, профессор,   Ыдрысов Әбілфайыз Ыдрысұлы - Қазақстанның еңбек сіңірген қайраткері,        профессор, жазушы, Қазақстан республикасының еңбек сіңірген мәдениет қызметкері Шәлекенов Уахит Хамзаұлы - Ұлы Отан соғысының ардагері, тарих ғылымдарының докторы, профессор, ҚР Гуманитарлық Академиясының академигі, белгілі тарихшы,  археолог және этнолог, Оспанов Серик Сарсенгалиевич - физика-математика ғылымдарының докторы, профессор Қожахметулы Кеңесбай  - тарих  ғылымдарының докторы, профессор  Күмісбаев Өтеген Күмісбайұлы - Филология ғылымдарының докторы, профессор, шығыстанушы, ақын Даулетқалиев Сәкен Қаламқалиұлы – география ғылымдарының докторы, профессор Пузиков Федор Михайлович – Еңбек майданына қатысушы, тарих  ғылымдарының докторы, профессор Шигаева Майя Хажетдиновна - Еңбек майданына қатысушы, биология ғылымдарының докторы, профессор, ҚР ҰҒА академигі Сарсенбекова Гульнар Алибековна - философия ғылымдарының кандидаты, доцент,  хатшыwww.kaznu.kz