Ақтөбе обл. Мұғалжар ауд-н-да, Ақтөбе қаласынан оңтүстікке қарай 240 км жерде. Батысында Жаңажол Мұнай - газконденсат кенімен түйіседі. Кен орны 1962 -63 жылдары сейсмикалық зерттеу нәтижесінде анықталған. Іздеу-барлау жұмыстары 1979 жылы басталды. Тек - тоник. жағынан кен құрылымы өлшемдері 18 X 4,5 км, ендік бағытта созылған брахиантиклинальдік қатпар. Коллекторы кеуекті-жарықшақты, карбонатты жыныстардан (әктас,доломиттенген әктас) құрылған. Ашық кеуектілігі 9-дан 9.6% -ға дейін өзгереді, өткізгіштігі 0,173 мкм². Бастапқы қабаттық қысымы 37.3 МПа, температурасы 73°С. Бастапқы шығымы: мұнай 39.2 м³ тәулік, газ 28,2 м³ тәулік. Тұрақты конденсат мөлшері 345г/м³. Мұнай жеңіл және ауыр (0,827-0,886г/см³). Газ құрамы бойынша ауыр, құрамында этан, ауыр көмірсутек (20.5-31.8%), метан (55.5-72.8%) бар. Конденсаттың тығыздығы 0.753 г/см³. Кен орны өндірістік игеруге дайын.
