Қылмыстардың жиынтығы

Қылмыстардың жиынтығы — екі не одан да көп қылмыстық әрекеттердің шоғыры. Жеке адамға қатысты Қылмыстардың жиынтығы қылмыстық әрекеттерді жасаған адам қылмыстарының бірде-біреуі үшін сотталмағандығымен немесе заңда белгіленген негіздер бойынша қылмыстық жауаптылықтан босатылмағандығымен сипатталады. Айыптының әрекетінде Қылмыстық кодекстің түрлі баптарында немесе баптардың бөліктерінде не болмаса бір баптың түрлі тармақтарында көрсетілген қылмыс құрамы болады. Сондай-ақ адам әрекетінің бір бөлігі болған қылмысты, басқасы қылмысқа дайындалуды, оқталуды немесе қылмысқа қатысуды түзетін болса, онда мұндай әрекет те Қылмыстардың жиынтығы болып шығады, яғни Қылмыстық кодекстің екі не одан да көп баптарында көзделген қылмыс, қылмыстық белгілері бар іс-әрекет (әрекетсіздік) Қылмыстардың жиынтығы деп танылады. Егер айыптының қылмысы жалпы және арнаулы нормаларда көрсетілген болса, онда Қылмыстардың жиынтығы бола алмайды, сондықтан оны жасаған адам қылмыстық жауаптылыққа арнаулы норма бойынша тартылады (ҚР Қылмыстық кодексі, 12-бап).

Дереккөздер

Қазақстан ұлттық энциклопедиясы