Үгіт

Үгіт (гр. 'agіtatіo' — қозғалысқа салу) — бұқара халыққа саяси әсер ету, белгілі бір мақсатқа бағыттау құралы. Үгіт көпшілікті белсенді әрекетке итермелейтін белгілі бір идеяны, ұранды тарату арқылы көрінеді. Саяси үгіт саяси топтардың мүддесін көздеп, белгілі бір топтың немесе адамның көпшіліктің қолдауы арқылы саяси билік күшін иеленуіне қызмет жасайды.

Үгіт таратудың жолдары әр алуан. Мәселен, әңгімелесу, жиналыста баяндама жасаудан бастап, бұқаралық ақпарат құралдарын пайдалану, плакат, сурет, кино, театр, т.б. насихат құралдары арқылы іске асырылды.Үгіт саяси-әлеуметтік топтардың саяси, мәдени деңгейін, әлеуметтік, кәсіби мүдделерін, т.б. факторларды ескере отырып жүргізіледі. Үгіт адамдарға түсінікті, нақты, күнделікті өмірмен тығыз байланыста төзімділікпен жүргізілсе ғана тиімді болады. Қазақстанның қазіргі қоғамдық өміріндегі демократиялық жаңғырулар мен азаматтық қоғам құру, мемлекеттілікті нығайту үрдісі жағдайында, мемлекетшілдік идеясы тұрғысында үгіт-насихат жұмыстарының маңызы зор.

Санаға, көңіл-күйге, тұрғындардың қоғамдық, белсенділігіне ықпал ету үшін оларды бір нәрсеге сендіру немесе белгілі бір әрекеттерді жасауға бейімдеу мақсатымен идея тарату.

Сілтемелер

"Қазақ Энциклопедиясы", 9 том