Үйгентас

Үйгентас - тарихи аңыз. Талдықорған өңіріндегі жер атауына байланысты туған халық аңыздарында Қабанбай бастаған қолдың жоңғарларды қалай тұтқынға алғандығы жайлы әңгімеленеді. Қазақ батырлары кеңесіп, жоңғарларды қазақ жеріне қайта келместей етуді ұйғарады. Оларға үлкен бір шұңқырға өздері көтере алатын бір-бір тасты тастап, енді қайтып осы шекарадан өтпеуге ант берсін деп шешім жасайды. Жоңғарлардың көп болғандығы соншалық, үйілген тас тауға айналады. Содан бұл жер "Үйгентас" деп аталған. Аңызды Шығыс Қазақстан мемлекеттік университеті қазақ әдебиеті кафедрасының фольклорлық экспедициясы Тарбағатай өңірі қазақтарынан жазып алған. Ел арасында аңыздың бірнеше нұсқасы бар. Қолжазба нұсқасы аталған оқу орнының қазақ әдебиеті кафедрасының арнайы қоры мен Әдебиет және өнер институтының қолжазбалар орталығында сақтаулы.