Үлестік баға

Үлестік баға, меншікті баға — тауар өлшемінің немесе тұтыну құны өлшемінің орташа бағасы.

Дайындалған, сатылған, әкетілген немесе әкелінген белгілі бір тауарлардың құны, мөлшері сыртқы сауданың жалпы статист. көздерінде баяндалған бастапқы деректері негізінде есептеледі. Үлестік баға экспорт және импорт бойынша: елден әкетілетін қайсыбір тауардың бүкіл экспорты бойынша немесе жекелеген елге әкетілетін экспорттың орташа бағасы (белгілі бір кезеңде әкетілген тауардың құнын оның санына бөлу жолымен есептеледі) бойынша; жекелеген елден әкелінетін қайсыбір тауардың бүкіл импорты бойынша немесе осы елдің бүкіл импортының орташа бағасы бойынша бөлек-бөлек есептеледі. Үлестік баға статист. есеп пен талдау құралы болғандықтан, оның бағаның басқа түрлеріне, мысалы, анықтамалық бағаға қарағанда кейбір артықшылықтары бар. Үлестік бағаны пайдалану кезінде оның белгілі бір кезеңде нақты жасалған экспорттық-импорттық мәмілелердің бағасын ғана емес, сонымен бірге белгілі бір кезеңдегі экспорт пен импорттың нақты көлемін де көрсететіні ескеріледі. Неғұрлым дәл ақпаратты жылдық Үлестік баға береді, ол сыртқы сауда операциялары көлемінің көптігін көрсетеді. Үлестік бағаның серпіні өнеркәсіптік бұйымдардың меншікті экспорттық бағасы индекстерінің, сондай-ақ БҰҰ статистикасы жариялап тұратын тиісті жиынтық индекстердің көмегімен зерделенеді.