Ұлттық ойын-сауық жарыстарда киетін киімдер

Ұлттық ойын-сауық жарыстарда киетін киімдер - жалпы спорт ойын-сауық жарыстарда киетін киімдер сияқты қарапайым әрі қимылдауға оңай болған. Денені спорт ойынында болатын жарақаттардан қорғау үшін, мұндай киімдерді қатты, ширақ маталардан тігеді.

Әртүрлі жарыстардағы киім түрлері

Балуан күрестіру – қазақта өте ертеден келе жатқан ата салтымыз. Қазақ халқы балаларын жастайынан күреске баулыған. Балуандар кәзекейшең, беліне мата белбеу буып, кең балақ шалбар киіп күреске түскен. Кейде жалаң шалбармен ғана кеудесін жалаңаштап беліне кездеме белбеу буып, жалаң аяқ күрескен. Күрескенде киетін кәзекей қалың кездемеден мықты тігілуі шарт болған. Тәртіп бойынша балуандар белбеуден ғана ұстаулары керек.

Бәйге – қазақтың ата-бабадан келе жатқан ғажап салттарының бірі. Ат бәйгеде көбіне аттың беліне жеңіл болсын, күш түспесін деп бәйге атына жас балаларды мінгізеді. Шабандоздар басына шыт орамал тартады, үстіне жейде, кәзекей, жалаң шалбар, аяғына жеңіл етік киеді.

Қыз қуу – қазақтың еш елге ұқсамайтын аса ерекше ұлттық ойыны. Мұны қызықтауға кәрі-жас, еркек-әйел, бала-шаға түгел қатысқандықтан халық өте көп әрі көңілді болады. Той болған соң келген қонақтар киімдерінің де жақсыларын киеді. Ойынға қатысушы жігіттер басына қалпақ, тақия, үстіне жейде, кәзекей, жалаң сым, етік киеді. Қыздар болса басына үкілі тақия немесе бөрік үстіне желбір көйлек, кестелі кәзекей, жекет, кестелі тізе қап, аяқтарына шеттік , көксәуір етіктер киіп түседі.

Қазақ көкпарға бастарына тақия, қалпақ сияқты жеңіл баскиім немесе жалаң бас, үстеріне жалаң жейде, сыртынан кәзекей киіп, беліне мата кездемеден белбеу буынып, жалаң шалбар, аяғына етік киіп түскен. Аударыспаққа түсетін жігіттер де көкбарға түскен жігіттердей киінеді. Күміс ілу, қарауыл ату сияқты ойындардың бәріне киетін киімдер негізінен ұқсас болады.