Ілияс Оразов

Ілияс Оразов(15.10.1922, Өзбекстан, Ташкент облысы,Янгиюл ауданы- 11.2.1945, Венгрия) - 2-дүниежүзілік соғысқа катысушы, взвод командирі, лейтенант,қазақ. Шаңышқылы тайпасының Қырықсадақ руынан шыққан.

Соғысқа дейін Ташкент облысында ұжымшарда жұмыс істеген. Кеңес әскері қатарына 1941 жылы шақырылып, З-Украина майданы 57-армия 233-атқыштар дивизиясы 572-атқыштар полкі құрамында Ұлы Отан соғысына қатысқан. 1944 жылы кіші лейтенанттар курсын бітірген. Осы жылы 12 қарашада Оразовтың взводына Дунай өзенінен (Югославия, Самбор қаласының Солтүстік-батысы) бірінші болып өту тапсырылды. Өзеннің сол жағалауындағы алдыңғы шепті басып алған Оразовтың взводы плацдармды 1 тәулік бойы ұстап тұрды әрі жаудың қарсы шабуылдарын тойтарып отырды. 7-атқыштар ротасының командирі қатардан шығып, орнын Оразов басты. Оразовтың басшылығындағы жауынгерлер жаудың 7 қарсы шабуылын тойтарды. 20 қарашадағы биіктік үшін болған кезекті бір ұрыста Оразов дұшпанның траншеясына алдымен кіріп, қолма-қол айқаста жаудың 5 әскерін жойды. Румыния жерінде болған ұрыстарда көрсеткен ерлігі үшін Оразовқа КСРО Жоғарғы Кеңесі Төралкасының Жарлығымен Кеңес Одағының Батыры атағы берілді (24.3.1945). Туған ауылында көше мен орта мектепке Оразов есімі берілген. Ленин, «Қызыл Жұлдыз» ордендерімен, медальдармен марапатталған.