Іңкәрдария (құрғақ өзек)

Іңкәрдария – Сырдария алабындағы құрғақ өзек.

Географиялық орны

Қызылорда облысы Сырдария ауданы жерінде орналасқан.

Сипаты

Солтүстік Қызылқұмның оңтүстігіндегі Ескі Жаңадария каналының оң жағынан айрылады. Ұзындығы 138 км. Ол екі телімге бөлінеді: біріншісі – сағасынан бастап 71 км-ге дейін, ені 20 – 30 м, тереңдігі 0,7 – 1 м; екіншісі – 71 км-ден 138 км-ге дейін, ені 40 м-ден 20 м-ге дейін, тереңдігі 2 м-дей. Өзек төмен қарай біртебірте жайпауыттанып жоғалады. Өзектің бас жағы мен Сырдария өзенінің арнасында ауқымды кеңістікті лай басып қалған. Сол себепті бұл екеуінің арасында байланыс жоқ. Қызылқұм қойнауын мекен еткен тұрғындар 1908 – 16 жылдары аралығында Іңкәрдария аңғарында егін егумен айналысқан.