Абылайдың ақ туы

Абылайдың ақ туы — Абылай ханның жауынгерлік туы. Кезінде бүкіл қазақ халқының атынан айтылатын жауынгерлік ұран ретінде қолданылған. 20-ғасырдың басында қазақ интеллигенциясы, Алаш орда жетекшілері халықты бірлікке шақырып, Абылайдың ақ туы астында жиналайық деген үндеу тастаған. Шын мәнінде Абылайдың ақ туы – тарихи ат, жоңғар шапқыншылығына қарсы соғыста көтерілген ту, заттық тарихи мүлік. Қыл шашақты, көлемі 2 шаршы метрлік ақ жібек матадан жасалған. Ол 1930 жылға дейін Арыс қаласының маңындағы «Ханқорған» елді мекеніндегі төре тұқымдарының қолында сақталып келген. Ел арасындағы әңгімелердің бірінде туды НКВД адамдары алып кеткен, басқа дерек бойынша – жергілікті халық бөліп-бөліп алған.