Авар жазуы - нах-Дағыстан тілдерінің авар-анди тобына енетін авар тілінің жазуы. Таулы Дағыстанда тұратын кавказ халқының жазуы. А.ж. (аджам) араб графикасы негізінде XVI ғасырда пайда болған. Аварлықтардың Кавказдық Албания кезінен бастап өзінің жазуы болған. Авар ұлттық ғылымының негізін салушылардың бірі Кудутлядан Мусалав Магомед болды. 1928 жылы аварлықтар үшін латынға негізделген әліпби құрастырылып, бекітілді. 1930 жылдан бастап латынға негізделген А.ж. барлық ресми салаларда қолданылды. Бұл әліпбидің алғашқы нұсқасында бас әріптер болған жоқ. 1930 жылдың соңында КСРО-да жазуды кириллге көшіру үдерісі басталды. 1932 жылы әліпбиге реформа жасалып, бас әріп пен бірқатар таңбалар енгізілді. 1938 жылы 5-қаңтарда Дағыстан халықтарының әліпбиі кириллге көшірілді. 10-ақпанда аварлардың жаңа әліпбиі «Дағыстан жаңалықтары» газетінде жарияланды. Әліпбиге аздаған өзгерістер енгізілді. Қазіргі А.ж. кирилл графикасына негізделген.
