Азия социалистерінің конференциясы

Азия социалистерінің конференциясы (АСК) – Азия мемлекеттерінің социалистік (социал-демократиялық) партияларының регионалдық бірлестігі. 1953 жылы құрылды. Бірлестікке Жапония, Израиль, Цейлон, Ливан, Малайзия, Индонезия, Бирма, Оңтүстік Вьетнам, Пәкістан, Непал, Индия социалистік партиялары енеді. АСК-ға енетін партиялардың 500 мыңдай мүшесі бар, штаб-пәтері Рангунда (Бирма). 1969 жылы АСК ауыр дағдарысқа ұшырады. Бас конференция 1956 жылдан бері шақырылмады, оның бюросы мен секретариаты да ешбір әрекет жасамады. У Ба Све (Бирма) бастаған АСК басшылары партияның қатардағы мүшелерінен оқшау қалды. Индонезияда, Бирмада, Пәкістанда және Непалда социалистік партияларға тыйым салынып, Оңтүстік Вьетнамда социалистік партияның күйреуі салдарынан соц. Партиялармен АСК-ның байланысы нашарлады. АСК-ның келісімпаздығы, реформизмі, коммунистік қозғалысқа қарсы шығу оның құлдырауына себепші болды. Бірлесткке енетін барлық партиялардан тек Жапония социалистік партиясы мен кейбір басқа партиялар империализмге қарсы тұрып, бейбітшілікті, демократияны, социалистік прогресті қолдап отырды.