Айбар Қайнарұлы Олжаев

Айбар Қайнарұлы Олжаев (1 тамыз 1983, Алматы) – белгілі PR маманы, журналист, публицист, қазақша коммуникация бойынша ОБСЕ ұлттық кеңесшісі, "PR-шы" клубының экс вице-президенті.

Айбар Олжаев

Өмірбаяны

Айбар Олжай 1983 жылдың 1 тамыз күні Алматы қаласының Медеу ауданында журналистер отбасында дүниеге келген. Орта жүздің Найман руынан шыққан.

Үш жасында әкесінің қызмет бабымен Қарағанды қаласына көшеді. 1988 жылы Алматыға қайтып оралады. 1990 жылы Алматыдағы №123 мектепке оқуға барады. 1994 жылы №141 орта мектепке ауысып, 2000 жылы сол мектепті аяқтап, Әл-Фараби атындағы Қазақ ұлттық университетіне "теле/радио журналистика" кафедрасына түседі. 2004 жылы оқуын тәмамдайды.

Қызметі

Студент кезінде 2003 жылы "Оңтүстік астана" телеарнасында жұмыс істей бастайды. 2007 жылы "Астана" телеарнасының Алматы қаласындағы меншікті тілшісі қызметіне ауысады. 2009 жылы "Жетінші арнаның" Алматыдағы бюросында сарапшы қызметіне кірісіп, артынан бюро басшысы болып тағайындалады. 2012 жылы "Алматы" телеарнасына Бас директордың орынбасары қызметіне шақырту алады. Ол қызметінде Айбар Олжаев ішкі телеөндіріс, шығармашылық жұмыс және жарнама тарту бағыттарына жауапты болады. 2014 жылы оны Алматы қаласы әкімі Ахметжан Есімов өзінің баспасөз-хатшысы/баспасөз-қызметінің жетекшісі қызметіне жұмысқа шақырады.

2015 жылы Алматы әкімі ауысқаннан кейін, "Қазақстанның Тұрғын үй құрылыс жинақ банкі" АҚ баспасөз-хатшысы қызметіне шақырту алады. Ал 2017 жылы банктің акционері болып табылатын "Бәйтерек" Ұлттық басқарушы холдингінің баспасөз-қызметі Айбар Олжаевты бас кеңсеге, Астана қаласына шақыртады.

2018 жылдың наурыз айында Қазақстанның тұңғыш Президенті Нұрсұлтан Назарбаев «7-20-25» ипотекасы туралы жариялап, оны іске асыруды Қазақстан Республикасының Ұлттық Банкіне тапсырды. Ұлттық банк ол үшін шұғыл түрде «Баспана» еншілес ұйымын құрды. 2018 жылдың маусым айында «Баспана» ипотекалық ұйымының басшылығы Айбар Олжаевты жаңа ипотеканы насихаттау мен коммуникациясын жүргізу мақсатында қызметке шақырады. 2018 жылдың 5 шілдесінде алғашқы ипотекалық несиенің берілуімен «7-20-25» бағдарламасы ресми түрде өз жұмысын бастады. Айбар Олжаев қазіргі таңда ең танымал «7-20-25» ипотекасының коммуникациялық қызметін әу бастан, үздіксіз жүргізіп келеді.

«Баспана» ипотекалық ұйымы 2019 жылдың соңында тұрғындардың сұранысын қанағаттандыру мақсатында қолданыста болған үйлерге несие беретін коммерциялық ипотеканы іске қосты. Сол кезде Айбар Олжаев оған «Баспана Хит» деген ат ойлап тапты. «Баспана Хит» толық циклін сәтті өткеріп, 600 миллиард теңге ипотека берді және жоспарлы түрде 2021 жылдың 31 желтоқсанында аяқталды.

2020 жылы «Баспана» Ұлттық банктің басқа еншілес ұйымы – Қазақстанның орнықтылық қорымен біріктірілді. Айбар Олжаев "Баспана" командасымен бірге біріккен компанияға ауысты.

Әл-Фараби атындағы Қазақ Ұлттық университетінде "ЮНЕСКО және коммуникация" кафедрасында лектор. AlmaU университетінің медиа және кино мектебінде сыртқы лектор.

Отбасы

Әкесі Қайнар Қалиақпарұлы Олжай – қаламгер, журналистика майталманы, "Қазақстан РТРК" АҚ Басқарма төрағасының орынбасары. "Жер мен аспан арасындағы дастан", "Қой баққан қиын" кітаптарының авторы.

Анасы Гүлжанат Шаймерденқызы Құстанова – журналист, "Мектептегі психология. Психология в школе", "Білім кілті – Ключ знаний", "Педа­гог", "Мектептегі мерекелер" журналдарының бас редакторы.

Айбар Олжаев Алмагүл Олжаевамен 2005 жылдан бері шаңырақ көтерген. Үш баласы бар. Қызы - Олжаева Адел Түркиядағы Эгей университетінде акушер-гинеколог мамандығы бойынша білім алады. Ұлдары Данияр мен Санжар Олжаевтар 2024 жылғы жағдай бойынша орта мектептің жоғарғы сыныптарында оқиды.