Айдар Жамханұлы Жамхан

Айдар Жамханұлы Жамхан 1978 жылы 11 шілдеде Алматы қаласында туған. Қазақ. Әкесі - Тұлымбеков Жамхан Ақылбекұлы, зейнеткер, мал дәрігері болған. Анасы - Тұлымбекова Жұмагүл Жұмаханқызы, зейнеткер, оқытушы болған.

Алматы республикалық көркемсурет колледжін (1996) кескіндеме шебері мамандығы бойынша; Қазақ мемлекеттік көркемөнер академиясының «Монументалды кескіндеме» бөлімін (2000) суретші-кескіндемеші мамандығы бойынша; Т. Жүргенов атындағы Қазақ ұлттық өнер академиясының магистратурасын (2002) кескіндеме магистрі мамандығы бойынша бітірген.

1997 жылдан көрмелерге қатысады. «Аңырақай шайқасы» соғыс кескіндеме суретінің, Алматы облысы әкімінің қонақ резиденциясына арналған кескіндемелік шығармалар сериясының авторы. М. Мұқановпен бірге «Реңкті дала», «Дала мозаикасы», «Дала арабескасы» гобелендер сериясын және гобелен техникасында «Түран дәуірі» монументалды-сәндік панно жасаған. М. Мұқановпен бірге Е. Төлепбайдың жетекшілігімен ҚР Жоғарғы соты мен «Ақ Орда» ҚР Президентінің резиденциясының (Астана қаласы) интерьерлеріне арнап монументалды-сәндік панно-гобелендер сериясын жасады. Ғ. Ешкеновпен бірге Қызылорда қаласы мен Қостанай облысы Қарабалық аудан орталығының орталық мешіттері, Талдықорған қаласы «Достық үйі» мен Б. Шолақ атындағы Спорт сарайының интерьерлерін көркем безендіру және оны іскө асыру жобаларын, сонымен қоса Алматы метрополитенінің «Райымбек», «Алатау», «Жібек жолы», «Ал- малы» стансаларының интерьеріне арналған монументалды-сәнді паннолар жасады. Жұмыстары «АқОрда» ҚР Президентінің резиденциясында және Астана қаласы Президенттік мәдениет орталығында, Қазақстан мен шет елдің: Португалия, Испания, Франция, Ресей жеке коллекцияларында сақталуда. Суретші-монументшілер тобының құрамында Алматы, Астана, Павлодар, Петропавловск қалалары орталық мешіттер интерьерлерін, сонымен қатар «Нұр-Астана» және Шүбар шағын ауданы мешіттерінің (Астана қ.) көркем безендіру жұмыстарына қатысты.

2000-2006 жылдары - Т. Жүргенов атындағы Қазақ ұлттық өнер академиясының «Кескіндеме» кафедрасының оқытушысы.

ҚР Суретшілер одағының мүшесі. ҚР заманауи бейнелеу өнерінің дамуына қосқан үлесі үшін Мемлекеттік «Дарын» жастар сыйлығының лауреаты атанды (2008). «ҚазЭКСПО» Бүкіләлемдік халықаралық көрменің дипломанты (Мүхит-98, Лиссабон қаласы, Португалия). ҚР жыл сайынғы «Жігер» жас суретшілер (Алматы қаласы, 1997-2000) және «Шабыт» шығармашылық жастардың (Астана қаласы, 2000-2004) фестивальдерінің қатысушысы әрі дипломанты.

Хоббиі - бильярд, заманауи кескіндеме мен гобелен өнері.

Үйленген. Жұбайы - Жамхан Жанна Бақытжанқызы (1978 жылы туған), көркемсуретті экспозициялар және көрмелерді ұйымдастыру бойынша менеджер. Қызы - Жамхан Аяжан Айдарқызы (2003 жылы туған); ұлы - Жамхан Дарын Айдарұлы (2006 жылы туған).