Айы толды

Айы толды - екіқабат әйелдің босанатын мезгілі таянғанын, жеткендігін білдіретін атау. Әдетте, жүкті әйел баласын тоғыз ай, тоғыз күн көтереді, осы аталған «тоғыздарға» жақындағанда ай-күні жетті, ай-күні толды дейді. Тұрақты тіркестің бұлай айтылу себебі жүктілікті толған айға ұқсатумен және байырғы көшпелі ортада айды қасиетті киелі деп санаған ұғыммен байланысты. Ай орағының қылдырықтай болып көрініп, бірте-бірте толуы көне шығыс халықтарында айды әуелде әйел затының тәңірі деп танитын мифологиялық түсінікке негіз болғанға ұқсайды.