Айқас тігу

Айқас тігу - инемен тігілетін кестенің ең көп тараған түрі. Өрнек ізімен біркелкі төрт бүрышты етіп, бір жіптің үстінен екінші жіпті айқыш түрінде айқастыра бастырып отырады. Онымен орамал шаршының шетін әшекейлейді. Жетісудың оңтүстігінде оны «орыс кесте» деп те атайды.

Айқас тігудің қосбасарлап, бесбасарлап тігу деген түрлері болады. Қосбасарлап тігу - ол қосу бірінші жіпті көлденең алып, екінші жіпті тік шаншиды. Ол керегекөз тігісіне ұқсас болғанымен, орындалу техникасында өзгешелік бар: тігіннің астындағы жіп шалынып келеді. Оны кесте айшық мәніндегі көркем тігістерге қолданады. Үшбасып (үшбасарлап тігу) тігу - Оны алдымен алғашқы екі жіпті көбейту амалының белгісі түрінде (X) тігіп алады да, соңғы үшінші жіпті соның белінен көлденең басып тігеді. Нәтижесінде, тең алты тармақ пішін шығады. Бұл да көркем тігіске қолданылады. Төрт басып тігу, бесбасарлап тігу - үшбасып тігудің күрделі түрлері X крест түріндегі тігістің үстінен басып тігеді. Екі түрлі жіппен айшықтап тігетін көркем тігіс түрлері.