Академик Қаныш Сәтбаев (суретті альбом)

Академик Қаныш Сәтбаев - Алматыда 1999 жылы қазақ, орыс және ағылшын тілдерінде жарық көрген суретті альбом. Басылымның демеушісі - «Шеврон Мұнайгаз» ИНК. Бас редакторы - В.С.Школьник. Қаныш Сәтбаевтың ғұмырнамасы суреттер мен құжаттар негізінде баяндалған. Республиканың мемлекеттік мұрағатындағы, Ғылым Академиясындағы, Қаныш Сәтбаев атындағы мұражайдағы, оның серіктестерінің, туыскандарының, шәкірттерінің жеке мұрағаттарындағы барлық деректер толық қамтылған, бұл мұрағаттар ғалым ғұмырнамасын бұрын белгісіз болып келген жайттармен толықтырып, байыта түседі.

Сәтбаевтың суреттерде бейнеленген қас-қағым сәттері, ол бағалаған, оқыған, өзгертулер енгізген, ескертпелер жасаған, қарарлар жазған құжаттардың фотокөшірмелері арқылы оқырман қауым оның шынайы бейнесін көре алады. Альбом фотосуреттермен, түрлі түсті суреттермен әсем безендірілген. Көлемі 160 бет. Таралымы 1500 дана.