Актинолит

Актинолит (грекше аktіs — сәуле және lіthos — тас) — силикаттар класының амфиболдар тобына жататын минерал. Химиялық формуласы: Ca₂(Mg, Fe)₅[Sі₄O₁₁]₂(OH)₂. Агрегатының шоқ сәулеше тарамдалған бейнесіне байланысты осылай аталған. Кристалдары моноклиндтік сингонияда, ұзын призма, ине тәрізді болып түзеледі. Түсі жасыл, шыныдай жылтыр, қаттылығы 5,5-6,0, меншікті салмағы 3,1-3,3 г/см³.

Актинолит

Аустралия Актинолиті

Түрлері (құрылымына қарай):

• нефрит;
• биссолит;
• амиант (амфиболды асбест);
• смарагдит.

Актинолит негізінен кристалды тақтастар арасында кездеседі. Ол амфибол асбестің басты құрамдас бөлігі болып саналады. Одан отқа және қышқылға төзімді материалдар жасалады.