Алексей Михайлович Романов

Алексей Михайлович Романов (19.3.1629 — 29.1.1676) — орыс патшасы (1645—76); патша Михаил Федорович Романовтың ұлы, Петр І-нің әкесі. А. Михайлович тұсында дворяндардың билігі, шаруаларды қанау бұрынғыдан да күшейді, басыбайлы право толық күшіне енді. Мұның бәрі феодалдарға қарсы күресті күшейте түсті. Новгород көтерілісі (1650), Псков көтерілісі (1650), Мәскеу көтерілісі (1662), Степан Разин бастаған шаруалар сотысы (1670—71) болды. 17 ғ-дың 2-жартысында А. Михайлович абсолюттік монархияны күшейтуге, мемл. аппаратты нығайтуға, елді бір орталыққа бағындыруға, Земск соборлары мен Боярлар думасының ролін кемітуге, шіркеудің ықпалын төмендетуге тырысты.