Алексей Семенович Егоров

Алексей Семенович Егоров(22.11.1914, Өзбекстан, Әндіжан қаласы - 16.4.1970, Украина, Кировоград қаласы) - 2-дүниежүзілік соғысқа қатысушы, подполковник, партизан құрамасы командирінің орынбасары. Соғысқа дейін Алматы қаласында жұмыс істеген. 1942 жылы Чернигов- Волынь партизан құрамасында диверсиялық жұмыстар жөніндегі командирдің орынбасары болды. Құрама партизандары 1944 жылы наурызына қарай жаудың 683 эшелонын, 47 көпірін, 35 шақырымдық темір жол бойын жойып жіберген. 1944 жылы тамыз айында Словакия тауларында 22 адамнан кұралған топ 3 мың адамнан тұратын партизандар бригадасын құрды. Егоровтың басшылығындағы I-бригада 57 әскери жорық ұйымдастырып, жаудың 44 танкісін, 20 эшелонын жарып жіберді. Егоровқа КСРО Жоғарғы Кеңесі Төралқасының Жарлығымен Кеңес Одағының Батыры атағы берілді (2.5.1945). 1945 жылы запасқа шықты. Кировоград қаласында ескерткіш, мемориалдық тақта орнатылып, №9 орта мектеп пен бір көшеге есімі берілген. 2 Ленин, 2 Қызыл Ту, 2 Еңбек Қызыл Ту ордендерімен және көптеген шетелдік медальдармен марапатталған.