Алексий (Кутепов)

Алексий (шын аты-жөні Андрей Николаевич Кутепов, 10.5.1953 жылы туған, Мәскеу) — діни қайраткер, архиепсикоп. Жұмысшы отбасында дүниеге келген. Теология ғылымының (дін ілімінің) кандидаты. Ресейдің Подольск, Иркутск, Чита аймақтарында діни қызметтер атқарған. 1975 жылы 20 қарашада қасиетті әулие Алексийдің құрметіне Алексий деген есім мен архимандрит (діни миссия басшысы) атағы берілген. 1980 жылдан Ресейдегі Владимир, Суздаль, Муром, Троицк-Сергиев, Зарайск, Мәскеу шіркеулерінде басшы қызметтер атқарды. 1989 жылы архиепископ (аға епископ) дәрежесіне көтерілді. 1990 жылы 20 шілдеден Алматылық және қазақстандық архиепископ, ал 1991 жылдың ақпанында Алматы және Семей архиепископы болып тағайындалды. Алексий Қазақстанда ұлтаралық түсіністікті, рухани татулықты, ынтымақтастықты жақсарту жолында елеулі қызмет атқарып келеді. Сол еңбегі үшін Республика Президенті белгілеген Бейбітшілік және рухани ынтымақтастық сыйлығының 1995 жылғы иегері болды.

Дереккөздер

Қазақ энциклопедиясы