Алғырлық

Алғырлық — адамның психикасындағы зейінділік, зеректік, ұғымталдық сияқты ақыл-ой әрекеттерінің бір-бірімен үйлескен қасиеті. Алғырлық таным процестері арқылы адамның жанама ойлау әрекеттерімен ұштасып жатады. Ойы алғыр адам айналасындағы бейне-құбылыстарды шапшаң қабылдап, оларды ақыл-ой елегінен өткізіп, қажет кезінде қайта жаңғыртады. Халық: “Алғыр жігіт ақылына қарай іс қылар, олақ жігіт оңай жұмысты жүк қылар” дейді. Алғырлық — ақыл-ойдың жемісі ретінде адам ойының ұшқырлығы, талдау, жинақтау, салыстыру, абстракциялау, нақтылау секілді қасиеттерге тығыз байланысты. Алғыр адамның дүние танымы мен білімін көзқарасынан, ойды, іс-әрекетті қабылдауынан, соған қатысынан байқауға болады. Алғырлық балалардың жас ерекшеліктерімен ақыл-ойының даму деңгейіне сәйкес үнемі ілгері өрістеп, күрделіленіп отырады. Қазақ психологы Ж.Аймауытов баланың табиғи даму барысына қарай Алғырлыққа тәрбиелеу үшін оқу материалын қиындатып отыру керектігін ескертеді. Педагогикадағы “дамыта оқыту” теориясының негізінде жас ұрпақты Алғырлыққа баулу мақсаты жатыр.

Дереккөздер

Қазақ энциклопедиясы