Тұтқыбаева Гүлжан Ұсанбекқызы

ТҰТҚЫБАЕВА Гүлжан Ұсанбекқызы (12.3.1964 ж. т., Алматы) – балерина, Қазақстанның халық артисі (1996). Алғашында Мәскеудің академия хореогр. училищесін (1982, П.А. Каленченко және проф. Р.С. Петерсон), одан кейін Алматы мемлекеттік театр және кино ин-тының хореогр. режиссурасы ф-тін (проф. З.Райбаевтың жетекшілігімен) бітірді. 1982 жылдан Қазақтың мемлекеттік академия опера және балет театры құрамында жетекші балерина ретінде қызмет етіп, Қарагөз (Ғ.Жұбанованың осы аттас балеті), Қалыңдық (С.Еркімбеков, “Мәңгі от”), Қалыңдық, Шамхат (Т.Мыңбаев, “Фрескалар”), Одетта-Одиллия, Маша, Аврора (П.И. Чайковский, “Аққу көлі”, “Шаттауық” пен “Ұйқыдағы ару”), Китри (Л.Минкус, “Дон-Кихот”), Эгина (А.И. Хачатурян, “Спартак”), Зарема (Б.В. Асафьев, “Бақшасарай фонтаны”), Раймонда, Жизель, Сильфида (А.К. Глазунов, А.Адан мен Шнейцгоффердің осы аттас балеттері), Кончита (А.Л. Рыбников, “Юнона мен Авось”), Әйел (А.Онеггер, “Ер мен әйел”), т.б. партияларды биледі. 1997 жылдан репетиторлық және пед. қызметпен айналысады: аға оқытушы, 2002 жылдан Қазақ ұлттық өнер академиясында хореогр. режиссурасы кафедрасының меңгерушісі. Қазақтың мемл. академ. опера және балет театры құрамымен Ресейде (Иваново, 1983; Грозный, Краснодар, Сочи, 1986; Орынбор, 1997), Өзбекстанда (1998, Ташкент), Қытайда (Шанхай, 1993; Пекин, 1994) Мальтада (1991), сондай-ақ жеке өзі гастрольдік сапармен Санкт-Петербург (1990 – 91), Екатеринбург (1992), Мәскеу (1993), т.б. қалаларда болып, өнер көрсетті. Халықаралық балет артистері байқауларының (Мәскеу, 1989; Варна, 1990; АҚШ-тың Джексон қ., 1990) дипломанты, 2-Халықаралық “Дәстүр жүлдесі” фестивалінің, “Дарын” сыйл-ның (1992) иегері.

Сілтемелер

"Қазақ Энциклопедиясы", 8 том