Асыл қорытпа

«Асыл қорытпа» («Благородный сплав») — Мұхтар Әуезовтың шағын мақаласы. 1957 ж. 6 қарашада «Известия» газетінде шыққан. Әуезов мақаланы Октябрь революциясының 40 жылдығына орай жазған. Әдеттегі сарынмен революция әкелген жаңалықтар мен жақсылықтарды дәріптеп, жаңа адам қалыптасқаны жайында айтады. «Асыл қорытпа» («Благородный сплав») деп отырғаны - осы революциядан кейін қалыптасқан жаңа адам. Мақалада

«Өзімнің қоғамдық қызметімді кеңес аппаратының қызметкері, кейінірек КазЦИК-тің мүшесі ретінде бастағанмен қазақтың патриархалдық-феодалдық қоғамы жағдайында біздің өкіметтің кедей-кепшіктерді, езілгендерді қалай қорғағанын жақсы білемін»

деген сөздер М. Әуезов өмірінің кей жылдарынан көрініс береді. Мұнда 1919-1921 ж. Семей губерниялық атқару комитетінде инародчески (буратана) бөлімді (кейін қазақ бөлімі) басқарып, губком төрағасына дейін қызмет атқарғаны, 1921-22 ж. Орынборға ауысып КирЦИК-тің жауапты хатшысы болған кездері айтылады. Мақалада Қазақ КСР Жоғарғы Кеңесі депутаттарының саны мен сапалық қурамы көрсетілген. Қоғамдағы барлық жетістіктерге жеткізуші күш - совет үкіметінің В. И. Ленин идеяларымен қаруланған дана басқарушылығы деген ойлармен мақала аяқталады.