Ауыз іші шырышты қабығы мен жақ сүйектердің рагы

Ауыз іші шырышты қабығы мен жақ сүйектердің обыры — ауыз шырышты қабығының эпителий тінінде пайда болатын қатерлі ісік. Қатерлі ісіктердің шамамен 10%-ті бет-жақ тұсында байқалады. Негізгі себебі ісік алды аурулар болып табылады. Қатерлі ісік эпителий тінінің құрылысын өзгертіп, сырқатқа шалдыққан жасушалардың тоқтаусыз жан-жаққа өсуімен қатар айналадағы жасушаларды, оның қан тамырларын бұзады. Қан және лимфа арқылы ісік жасушалары бүкіл организмге тарап, кез келгені ағзаларда пайда болады. Ісіктер паренхима (ұлпа) және стромадан( (тірек, тіреу) тұрады. Қатерлі ісіктерді шоғырлануына қарай ерін обыры, тіл және ауыз шырышты қабығының обыры, жақ сүйектер ісігі деп бөлсе, құрамына қарай — аденокарцинома (шырышты қабықтың эпителийі мен безден тұратын қатерлі ісік), мүйізденген және мүйізденбеген жалпақ жасушалы обыр, одонтогенді (тіспен тектес) обыр деп атайды. Сонымен бірге обыр пішінінің (формасының) өсуіне байланысты экзофитті, эндофитті және жаралы инфильтратты болып бөлінеді.