Ауыр қаза

«Ауыр қаза», Әуезовтің мақаласы. «Қазақ әдебиеті» газетінің 1956 жылғы 18 мамырдағы санында жарияланған. Әуезовтің «Уақыт және әдебиет» (1962, 394-400-беттер), 12 томдық (12-том, 1969, 156-159-беттер), 20 томдық (19-том, 1985, 356-359-беттер) шығармалар жинағына енген. Мақала орыс жазушысы А. Фадеевтің қайтыс болуына қазанама ретінде жазылған. Көрнекті орыс жазушысының адамшылық, азаматтық, қайраткерлік, суреткерлік ерекше қасиеттері, жанының таза, мөлдір әсемдігі, талғампаздық, талапшылдығы, шыншыл, әділдігі, дарқан мінезділігі, үлкен, өр мінезді басшылық қабілеті, сегіз қырлы, терең сырлы сипат қасиеттері аса мейірімді тебіреніс, толғаныспен сипатталған.

«Оның ұзақ жылдардағы үздіксіз талап, табыс өмірі өзі де бір ұзақ аққан ырыс өзеніндей болатын. Жақын жағасын да, өңір-өлкесін де ол өзен байытып, көгертіп аққан болатын. Ол өзі көмген ұрықтан дәні толы талай-талай жемістер тудырған»

деп, ұлы орыс қаламгерінің жан жомарттығын, көңіл шуағын, жүрек жылуын асыра бағалаған. Автор өзінің «Абай» романының тұсында «қолжазба күйінде және орысшаға тек подстрочник дәрежесінде аударылған қалпында да» қатты көңіл бөліп, көп ақыл қосқанын ерекше атап көрсеткен.