Ақбаев

Ақбаев Жақып (1876-1934) - Қазақстандағы ұлт-азаттық қозғалыс жетекшілерінің бірі, қоғам қайраткері, қазақ халқынан шыққан тұңғыш право магистрі. Санкт-Петербург Императорлық университетінің заң факультетін алтын медальмен бітірген. 1919-27 ж. Алаш қозғалысына белсене араласып, осы партия жетекшілерінің бірі болды, әрі Алаш автономиясы бас прокурорының қызметіне ұсынылды. Кеңес өкіметі тұсында 1919-28 ж. Семей губревкомында, Сырдария облыстық сот мекемелерінде қызмет істеді. 1922, 1929 ж. репрессияға ұшырап, Воронежге жер аударылды. Ақбаев Абай аулымен қоңсы қонған өңірде дүниеге келіп, жастайынан ұлы ақынның өлең-жырларына қанып есті. 1909 ж. Петербургте Абай өлеңдері жинағының басылуына қолғабыс жасап, оның ұлы Тұрағул, інісі Кәкітайға көп көмек көрсеткен. Ақбаевтың «Қазақстандағы семья-неке қатынастары» (1907), «Қазақтың шығу тегі туралы» (1927) атты ғылыми зерттеулері Абайдың қарасөздеріндегі тұжырымдармен және «Бірер сөз қазақтың түбі қайдан шыққаны туралы» деген еңбектерімен үндес.