Ақзат Әкімқұлұлы Бейсебаев

Ақзат Әкімқұлұлы Бейсебаев (26.6.1935 жылы туған, Жамбыл облысы Тараз қаласы) – медицина ғылым докторы (1986), профессор (1992). Алматы мемлекеттік мед. ин-тын (1959, қазіргі Қазақ ұлттық мед. ун-ті) бітірген. 1962–1982 ж. Қазақ клиник. және эксперименттік хирургия ғыл.-зерт. ин-тында (қазіргі Хирургия ғыл. орт.) ғыл. қызметкер, директордың орынбасары болды. Осы институтта оның бастамасымен балалар өкпе хирургиясы бөлімі ашылған, оған Бейсебаев жетекшілік етті. 1982 жылдан Қазақ онкология және радиология ғыл.-зерт. ин-тында аға ғыл. қызметкер, меңгерушісі, директоры (1987–1989). Негізгі ғыл. еңбектері кеуде хирургиясына арналған. Бейсебаев өкпе ісіктерін, плевра және көкірек (диафрагма) ауруларын хирургиялық жолмен емдеу мәселелерімен шұғылданады. Республикада тұңғыш рет тыныс алатын кеңірдек тарамдарын қайта қалпына келтіру операциясын жүзеге асырды. Бейсебаевтың 200-ге жуық ғыл. және 7 әдістемелік еңбектері, 2 монографиясы жарық көрді. 10 авторлық куәліктің иесі. Бейсебаев 20 мыңнан аса бала мен ересек адамның өкпесіне операция жасады (2002).