Ақтамақ қарлығаш

Ақтамақ қарлығаш - торғайлар отряды қарлығаштар тұқымдасының өкілі.

Ұсақ құс (салмағы 20 г), денесінің жоғарғы жағы – қара, төменгі жағы мен құйрық үсті – ақ түсті. Құйрығы қысқа, айыр. Қазақстанның солтүстік, оңтүстік және оңтүстік-шығысында кездеседі, шөл және шөлейтті бөлігінде кездеспейді. Адам құрылыстарында ұялайды, бірақ оңтүстік және оңтүстік-шығыста тауда үлкен топ құрып тіршілік етеді. Ұясы тік беткейлерге тостаған сияқты бекітіледі, оны ылғал топырақтан салады. Тік жарлар мен кейбір құздарда қуыстар мен індерде ұялайды. 2-6, көбіне 4-5 ақ жұмыртқасын аналығы мен аталығы кезектесіп 14-15 күнде басып шығарады. Ұсақ, ұшатын жәндіктермен қоректенеді. Ұялайтын жеріне сәуірдің басында ұшып келеді, қыркүйектің соңында ұшып кетеді.