Ақшабұлақ мұнай-газ конденсат кен орны

Ақшабұлақ мұнай-газ конденсат кен орны — Оңтүстік Торғай шөгінді алабының Арысқұм ойысымында орналасқан мұнай-газ-конденсат кен орны. Құрылым сейсмобарлау тәсілімен 1997 жылы айқындалып, іздестіру бұрғылауын жүргізуге дайындалды. Іздестіру жұмыстары 1988 жылы басталып, 1989 жылы өнеркәсіптік мұнайдың алғашқы ағымы алынған.

Ақшабұлақ мұнай-газ конденсат кен орны
45°57′30″ с. е. 65°45′07″ ш. б.45.95833° с. е. 65.75194° ш. б. / 45.95833; 65.75194
Ел	Қазақстан
Аймақ	Қызылорда облысы
Ашылған уақыты	1997 жыл
Игеріле бастады	1988 жыл
Өндіре бастады	1989 жыл
Ақшабұлақ мұнай-газ конденсат кен орны
Ақшабұлақ мұнай-газ конденсат кен орны

Географиялық орны

Қызылорда облысында, Жосалы станциясының солтүстік-шығысында 160 км жерде.

Геологиялық құрылымы

Кенорын үш күмбезбен күрделіленген көтерілімде орын алған. Бұрғыланған қиамының 1605-1915 м тереңдіктерінде анықталған төрт өнімді горизонттың үшеуі юра, біреуі неоком шөгінділерінде орналасқан. Горизонттар құмтастардың, алевролиттердің, саздардың, ішінара гравелиттердің қат-қабаттарынан құралған.

Жатыс сипаты

Жатындар қойнауқаттық, күмбездік, тектоникалық тұрғыдан қалқаланған. Су-мұнай жапсарларының абсолюттік белгілері -1760 м, -1640 м, -1638 м, -1530 м. Өнімді горизонттардың жалпы қалыңдығы 14 м-ден 66 м-ге, мұнаймен қаныққан тиімді қалыңдығы 2,2-19,2 м-ге дейін өзгереді. Жинауыштардың ашық кеуектілігі 11,2-20%, өтімділігі 0,0028-0,03 мкм².

Қанығуы

Мұнаймен қанығу коэффициенттері 0,51, 0,61, 0,75, қойнауқаттық қысымдары 17,59-19,25 МПа, темпеатурасы 38-74°С. Мұнайдың алғашқы шығымы 58-197 м³/тәу. Газдық фактор 63,7-128,7 м³/м³.

Құрамы

Мұнайдың тығыздығы 835 кг/м³. 3-інші юра горизонтының мұнайда еріген газдары ауыр, олардағы ауыр көмірсутектердің үлесі 10%-дан астам, метанның үлесіне 87,66% келеді, күкіртсутек 0,08%, азот 0,88%, көмірқышқыл газ 0,02%. 1-інші горизонтының газы метаннан (99,13%) тұрады, көмір қышқылының белгілері, болмашы мөлшерде азот бар. Жатындардың режимі суарынды. Кен орны сынама игеру сатысында.