Ақындар аллеясы

Ақындар аллеясы – ақын-жазушыларға арналған ескерткіштер кешені, тарихи-мәдени мұра. Темірландағы аудандық Мәдениет сарайының алдына орнатылған. Оңтүстікте туып өскен ақын-жазушылар Майлықожа Сұлтанқожаұлының, Нұралы Нысанбайұлының, Орынбай Тайманұлының, Бейсенбай Кенжебаевтың, Өтебай Тұрманжановтың, Көпбай Омаровтың, Қосжан Мүсіреповтің мүсіндері қойылып, аты-жөні, өмірге келген және дүниеден озған жылдары көгілдір мәрмәрға ойып жазылған. Мәрмәр тақтада «Ескерткіштер «Ордабасы оттары» газеті жанындағы Ғ.Мүсірепов атындағы әдебиет-өнер бірлестігінің тапсырысы бойынша жасалған. Мүсіншісі Кенжебаев1991 ж. мамырда №2 ЖМК құрылысшылары орнатқан» деп көрсетілген. «Ақындар аллеясының» ашылуына аудандық «Ордабасы оттары» газетінің редакторы, ақын Н.Бегалыұлы ерекше еңбек сіңірді.