Баа әд-Дин Нақшбанд

Баа әд-Дин Нақшбанд, Баһа әд-Дин Мұхаммед бин Бурхан әд-Дин Мұхаммед әл-Бұхари (1318 - 1389) - діндар ғұлама, XIV ғасырдағы ортаазиялық сопылық ағымның ірі өкілі. Нақшбандийа сопылық бауырластығын ұйымдастырушы. Баа әд-Дин Нақшбанд Каср-и хинжуван ауылында тәжік қолөнершісінің отбасында дүниеге келген. Алғашында шейһ Мұхаммед Баба-йи Симасиден (1340 жылы өлген), кейін Әмір Сайид Кулалдан (1370 жылы өлген) дәріс алған. Тарихи жазбаларда Баа әд-Дин Нақшбанд байлыққа қызықпаған, қанағатшыл тақуа адам болған деп көрсетіледі. Дүние салғаннан кейін Алланың сөзін жеткізуші қасиетті, әулие саналып есімі құрметтелген. Баа әд-Дин Нақшбанд рухани тазалық, сұғанақтыққа бой алдырмау, бақ-дәулетке қызықпау және қатаң сопылық тұрмыс-тіршілік құруды уағыздап, шариғаттың барлық шарттарын бұлжытпай орындауға шақырды. Бұхарадағы оның зиратына тұрғызылған (1544) кесене тәуап ететін қасиетті орынға айналды. Баа әд-Дин Нақшбанд жазбаша еңбектер қалдырмаған.