Балағаттау

Балағаттау, қылмыстық құқықта — басқа адамның ар-намысы мен қадыр-қасиетін әдепсіздікпен, анайы түрде кемсіту. Балағаттау жеке адамға қарсы бағытталған қылмыстардың бірі болып табылады. Бұл әрекет жәбірленушінің көзінше не сыртынан, ауызша немесе жазбаша жасалуы мүмкін. Жеке адамның намысын әдейі қорлап, қасақана Балағаттау ғана қылмыстық іс-әрекет болып саналады. Егер мұндай әрекеттер жұртшылық алдында сөз сөйлегенде, халыққа таралатын шығармаларда, бұқаралық ақпарат құралдары арқылы жасалса, бұл кінәлінің жауапкершілігін ауырлатады (ҚР-ның Қылмыстық Кодексі, 130-бап). Сондай-ақ, арнаулы заңдарда әскери қызметшілерді, өкімет өкілдерін балағаттағаны үшін, Президент пен депутаттың ар-намысына, қадір-қасиетіне тиіскені үшін қылмыстық жауапкершілікке тартуды көздейтін нормалар да бар.