Банкінің пассив операциялары

Банкінің пассив операциялары - банкілердің өз ресусртарын жасақтайтын операциялары: меншікті капиталын көбейту, салымдар (депозиттер) тарту, басқа да көздер табу, ақша шығару. Кредит және басқа актив операцияларын жүргізу үшін банкілер осы операциялар арқылы меншікті, қарамағына тартылған, эмиссияланған т.б. қаражатын құрайды. Банкінің пассив операциялары түрлерінің шамасы, құрамы, құрылымы активтердің көлемін, құрамы мен құрылымын, банкінің орнықтылығы мен өтемпаздығын алдын ала айқындайды. Пассив және актив операцияларды жүргізудің негізгі шарттарының арақатынасы, өтеу мерзімі мен пайыздық мөлшерлемелер сияқты банк тиімділігінің (табыстылығының) деңгейін көрсетеді. Ресурстардың елеулі бөлігін банкінің өзі жасауы банкінің пассив операцияларының ерекшелігі болып табылады. Меншікті ресурстар акциялар шығару, пайдадан сақтық қорға аударым жасау жолымен, басқа да көздерден жасақталады.