Баспа табақ

Баспа Табақ — баспа ісі мен полиграфия өндірісінде қолданылатын өлшем бірлігі. Полиграф. Баспа Табақтың стандартты форматы 60х90, 70х90, 70х108, 84х108 см қағаз парағының жартысына тең. Баспалардағы көлемдік өлшем авторлық баспа табақ, есепті баспалық табақ түрінде белгіленеді. Қара сөзбен жазылған 40 мың баспа таңба, өлеңнің 700 жолы, 3000 см² кескіндемелік материал авторлық баспа табақ болып саналады. Баспалық табақта да 40 мың таңба бар. Бұған әдеби шығармалар көлемі де, авторға қаламақы төленбейтін және графикалық материалдар көлемі де (редакциялық алғысөз, аңдатпа, кітап мазмұны, бет сандарының рет таңбасы, т.б.) кіреді.

Баспа табақ кез келген басылымның көлемін өлшеуге қолданылатын жалпыға бірдей қабылданған өлшем. Ол форматы 60x92 см-лік қағаз табағының бір бетіне басылым көшірме түсірілген табақ. Баспа табақта жасалған беттің жалпы саны қағаз табағы үлесінің, тап сол басылым үшін қабылданған түріне сай келеді (1/8 үлес болған кезде 8-ге, 1/16 үлес болған кезде 16-ға, 1/32 үлес болған кезде 32-ге, 1/64 үлес болған кезде 64 бетке тең). Бланкілік және билеттік өнімдердің баспа табақ мөлшерін өлшеу үшін 60x84 см-лік форматтағы қағаз табақшасы алынады.