Марат Оспанов атындағы Батыс Қазақстан медицина университеті

Марат Оспанов атындағы Батыс Қазақстан медицина университеті – медицина мамандарын даярлайтын жоғары оқу орны. Ақтөбе мемлекеттік медицина институты (1957) негізінде ҚР Үкіметінің 1997 жылғы 25 ақпандағы қаулысымен Ақтөбе мемлекеттік медицина академиясы болып қайта құрылды. Құрамына Ақтөбе, Орал, Атырау, Манғыстау медицина колледждері енеді. Республика батыс аймағының 4 облысы және Қызылорда, Қостанай, облыстары үшін дәрігер кадрларын даярлайды. Бес оқу ғимараты, жатақхана, зерттеу лабораториясы, санаторий-профилакториі, кітапханасы, спорттық-демалыс лагері, стадионы бар. Академия құрамында емдеу, педиатриялық және орта дәрігерлік ф-ттері бар. Онда 3000 студент оқып, 500-ден астам дәрігер кәсіптік білімін жетілдіреді. Медицина колледждерде 2000-ға жуық болашақ маман білім алады. 416 оқытушы дәріс оқиды, олардың 33-і ғылыми доктор, 168-і ғылыми кандидат 4 колледжде 247 оқытушы дәріс береді (1998). Академияда жүргізілетін ғылыми-зертханалық жұмыстарының негізгі бағыттары: жаңа дәрі-дәрмек жасау, тексеру, сынау; ірің хирургиялық инфекциясы, оның асқынуы; хронобиология, хронотерапия; патогенез, аурудың алдын алу, емдеу; әртүрлі патологиялық жағдайлар, отбасын жоспарлау т.б.

Марат Оспанов атындағы Батыс Қазақстан медицина университеті
Университет атауы
Жалпы сипаттамасы
Құрылған жылы	1957
Орналасуы
Орналасқан жері	Қазақстан
Мекенжайы	Ақтөбе қаласы, Маресьев көшесі, 68 үй
Әкімшілік
Ректоры	Қалиев Әсет Әскерұлы
Негізгі көрсеткіштер
Сайты	https://zkmu.edu.kz/

Деканаттар

• Жалпы медицина факультетінің деканаты;
• Қоғамдық денсаулық сақтау, стоматология, фармация және мейірбике ісі факультеттерінің деканаты;
• Жоғары оқу орнынан кейінгі білім беру деканаты;
• Халықаралық медициналық факультетінің деканаты.

Департаменттер

• Академиялық жұмыстар департаменті;
• Ғылыми жұмыстар жөніндегі департамент;
• Процесстерді автоматтандыру және цифрландыру департаменті;
• Адами ресурстарды басқару департаменті;
• Стратегиялық даму және халықаралық серіктестік департаменті;
• Экономика және жоспарлау департаменті;
• Пайдалану жұмыстары жөніндегі департамент.

Ректорлары

Марат Оспанов атындағы Батыс Қазақстан медицина университетінің ректорлары

Есімі	Лауазымды иеленген жылдар	Қысқаша ақпарат
Алмағамбет Бекішұлы Даиров	1957 - 1963	Ақтөбе медицина институтын ұйымдастырушы, тұнғыш ректоры. "Жалпы хирургия" кафедрасының меңгерушісі, медицина ғылымдарының докторы, профессор.
Николай Дмитриевич Растопчин	1963 - 1966	Медицина ғылымдарының кандидаты, доцент. Қазақ КСР Жоғары мектебінің еңбек сіңірген қызметкері, «КСРО денсаулық сақтау ісінің үздігі», Ұлы Отан соғысына қатысушы.
Василий Николаевич Андреев	1966 - 1968	"Факультеттік терапия" кафедрасының меңгерушісі, медицина ғылымдарының докторы, профессор. Ұлы Отан соғысына қатысушы.
Төрегелді Шарманұлы Шарманов	1968 - 1971	"Фармакология" кафедрасының меңгерушісі, медицина ғылымдарының докторы, профессор. КСРО Медицина ғылымдары академиясының академигі.
Ажмағи Смағұлұлы Смағұлов	1971 - 1995	"Рентгенология және медициналық радиология" кафедрасының меңгерушісі. Медицина ғылымдарының кандидаты, профессор. Қазақ КСР Жоғары мектебінің еңбек сіңірген қызметкері, «КСРО денсаулық сақтау ісінің үздігі»
Жанғали Құрманғалиұлы Ордабаев	1995 - 1998	"Микробиология, вирусология және иммунология" кафедрасының меңгерушісі, медицина ғылымдарының докторы, профессор. Қазақстан Республикасы Медицина ғылымдары академиясының академигі, «КСРО денсаулық сақтау ісінің үздігі».
Жақсылық Досмырзаұлы Досқалиев	1998 - 2000	"Факультеттік хирургия" кафедрасының меңгерушісі, медицина ғылымдарының докторы, профессор. Дүниежүзілік хирургтар қауымдастығының мүшесі, Қазақстан Республикасы Медицина ғылымдары академиясының академигі.
Қайрат Қанатұлы Жолмұхамедов	2000 - 2003	"Факультеттік хирургия" кафедрасының меңгерушісі, медицина ғылымдарының докторы.
Сәлім Фахатұлы Беркінбаев	2003 - 2007	Медицина ғылымдарының докторы, профессор. Қазақстан Республикасы Медицина ғылымдары академиясының академигі.
Ербол Жасұланұлы Бекмұхамедов	2008 - 2019	Медицина ғылымдарының докторы, профессор.
Мұрат Қойшыбайұлы Телеуов	2019 - 2021	Медицина ғылымдарының докторы, профессор.
Әсет Әскерұлы Қалиев	2022 жылдан бастап	Медицина ғылымдарының докторы, профессор.