Беннеттиттер

Беннеттиттер (лат. Bennettіtales) — мезозой дәуірінде тіршілік еткен ағаш тәрізді ашықтұқымды өсімдіктер. Қазбаларда қалдықтары табылған.

Беннеттиттер қазіргі саговниктерге ұқсас, олардың биіктігі 2 м-дей, сабақтары бұтақсыз болған, ал қауырсын тәрізді тілімденген жапырақтары ағаштың басында орналасқан. Беннеттиттердің саговниктерден айырмашылығы – гүлдері жапырақ қолтығында орналасқан, көпшілігінде қос жынысты. Тұқымы қос жарнақты, эндоспермсіз (ұрықтың қоректенуіне қажетті ерекше тін). Осы белгілерді алғаш рет ашқан ағылшын ғалымы Дж.Беннеттің (1801 – 76) құрметіне бұл өсімдік тобын Беннеттиттер деп атаған. Бұлардың 20-дай туысы белгілі, негізінен, Беннеттиттер юра және бор кезеңінің бірінші жартысында көп болған. Олардың қазба қалдықтары Қазақстанда Елек өзенінде триас кезеңі, Қаратау мен Маңғыстауда юра кезеңі, Ақтөбе облысындағы Шошқакөлден бор кезеңінің флорасы құрамынан табылған. Беннеттиттердің өсімдік эволюциясын анықтауда, триас, юра, бор кезеңдері шөгінділерінің түзілу мерзімін ажыратуда маңызы зор.