Берішті клавулина

Берішті клавулина (Clavulіna cartіlagіnea) — клавариялар тұқымдасына жататын саңырауқұлақ. Қостанай облысының Боровск орман шаруашылығы алқабынан табылған. Жемісінің биіктігі 4 — 5 см. Жоғарғы жағы кеңейген саусақ салалы цилиндр тәрізді, майда қыртыстары бар бұтақтардан, ал төменгі бөліміндегі аяқшасының ұзындығы 0,5 — 4 см, ені 2 — 4 см. Шумақталған жемісінің бір клеткасы екі ядролы, дикардионды жіпшелерден (мицелийден) тұрады. Қыртыстарының бетінде спора түзетін — базидийлер жетіледі. Ал спора түзбейтін клеткаларды парафизалар немесе гимений қабаты деп атайды. Өніп-өскен споралардан топырақ астында мицелий, одан топырақ бетінде жемістік денесі пайда болады. Олар қоректік зат іздеп, ұзарып, әсіресе, жаңбыр жауғанда қарқынды өседі. Ол алғашқы кезде қызғылт сұр, кейін сұр түсті. Саңырауқұлақ піскенде құрғақ, морт сынғыш келеді. Олар шіріп, топырақ түзуге қатысады. Жеуге жарамайды. Берішті клавулина өте сирек кездесетін саңырауқұлақ болғандықтан қорғауға алынып, Қазақстанның “Қызыл кітабына” енгізілген.