Бестер

Бестер — будан балық. 1952 ж. Ресей ихтиологы Н.И. Николюкиннің басшылығымен Еділде қортпа мен сүйрік балықтарын өзара қолдан ұрықтандыру арқылы алынған. Қортпа мен сүйріктің орысша аттарының (белуга және стерлядь) алғашқы буындарын алып, бестер деп атаған.

Қортпа балығы.

Сүйрік балығы.

Бестер қортпа тәрізді жыртқыш. Дене тұрқы 50 — 80 см (180 см-ге дейін), салмағы 3 — 5 кг (кейде 30 кг-ға жетеді). Өте тез өседі. Бұл будан өзара шағылысып, ұрпақ бермейді. Соңғы жылдары бестерді басқа бекіре балықтарымен қолдан ұрықтандырып, буданды жетілдіру жұмыстары жүргізілуде. Оның сыртқы пішіні мен белгілері қортпаға да сүйрікке де ұқсас. Бестер қортпа сияқты тез өседі әрі сүйрік сияқты жыныстық жағынан ерте (аталығы 3 — 4, аналығы 6—8 жасында) жетіледі. Ол тұщы суда да, тұздылау суда да тіршілік ете береді. Бестер тоған шаруашылықтарында қолдан да өсіріледі.