Бонифатий Михайлович Кедров

Кедров Бонифатий Михайлович (10.12.1903 – 10.9.1985) – философ, химик, ғылым тарихшысы, философия ғылымдарының докторы (1946), профессор (1946). КСРО ҒА-ның академигі (1966), Ғылым тарихы жөніндегі халықаралық академияның (1963), Серб ғылым және жер академиясының(Белград, 1965), Болгар ҒА-ның (1972), Герман табиғат зерттеушілер академиясының (1972) мүшесі. КСРО ғылым академиясының Философия, Жаратылыстану мен техника тарихы институттарын, “Вопросы философии” журналы редакциясын басқарған. Кедров диалектика мәселелерін жаратылыстану ғылымдарының тарихымен (әсіресе, химия саласы бойынша) байланыстыра зерттеген. Жаратылыстану ғылымдарының философия мәселелерін, ғылыми шығармашылықтың философия-психология заңдылықтарын талдаған, ғылымды жіктеу мәселесін жан-жақты қарастырған. Танымның жалпы әдісі ретіндегі диалектиканың категориялары, принциптері мен заңдарының методология қызметін ашып көрсетуге, диалектика теориясын құрудың принципті мәселелерін зерттеуде көп еңбек сіңірген. Қазақстанда философияның, соның ішінде, әсіресе, диалектикалық логика бойынша зерттеулердің дамуына көңіл бөліп, қолдап, ыждағатты лебізін білдіріп, мамандар даярлауға көмек берген. Алматыда диалектикалық логика мәселелері бойынша 1977 жылы өткен Бүкілодақтық екінші симпозиумның жұмысына ылы қатынасып, баяндама жасаған.