Ботаникалық Бақтардың Халықаралық Кеңесі

Ботаникалық Бақтардың Халықаралық Кеңесі (ББХК), 1987 ж. Ричмонд қаласында (Ұлыбритания) құрылған. Ол 75 елдің 400-ден астам ботаникалық бақтарын біріктіреді.

A.
Санкт-Петербург ботаникалық бағының жылыжайы

Қазақстаннан Алматыдағы Бас ботаникалық бақ пен Маңғыстау тәжірибелік ботаника бағы мүше. Кеңестің негізгі мақсаты — жер бетіндегі өсімдіктер дүниесін және ботан. бақтарды сақтаудың халықаралық стратегиясын және іс-жоспарын жүзеге асыру. ББХК өзіне мүше елдердегі ботаникалық бақтардың ұлттық, аймақтық ұйымдарын құрып, оларға техникалық басқару саласында, жиналған мәліметтерді саралау, жүйелеу және тиімді пайдалану үшін көмектеседі, кей жағдайда тікелей жәрдем де береді. Бұл ұйым ботаникалық бақтардың халықаралық конгрестерін өткізеді, семинарлар ұйымдастырады; озық тәжірибелерді, ғыл. жетістіктерді, мамандардың ойларын, ұсыныстарын жариялауға, басқа елдердегі әріптестерімен тәжірибе алмасуға жағдай жасайды. ББХК “Ботаникалық бақтарды сақтау”, “Ботаникалық бақтарда қоршаған орта туралы ағарту жұмыстарын жүргізу”, “Ботаникалық бақтар арқылы жер бетіндегі өсімдіктердің әртүрлілігін сақтау”, “Тамырлар”, “Жабайы өсімдіктерді реинтродукциялау жөнінде ботаникалық бақтарға арналған оқулық”, т.б. журналдар, анықтамалар шығарады; мамандардың білімін жетілдіру, табиғатты қорғау, жойылу қаупі төнген өсімдіктерді сақтау, сирек кездесетін өсімдіктерді көбейту, т.б. жөнінде практикалық ұсыныстар жасап, таратады. 1997 ж. Орталық Азия мемлекеттері (Қазақстан, Өзбекстан, Түрікменстан, Тәжікстан, Қырғызстан) ботаникалық бақтарының кеңесі құрылды.[1][2]

Дереккөздер өңдеу

  1. Қазақ тілі терминдерінің салалық ғылыми түсіндірме сөздігі: Экология және табиғат қорғау / Жалпы редакциясын басқарған – түсіндірме сөздіктер топтамасын шығару жөніндегі ғылыми-баспа бағдарламасының ғылыми жетекшісі, педагогика ғылымдарының докторы, профессор, Қазақстан Республикасы Мемлекеттік сыйлығының лауреаты А.Қ.Құсайынов. – Алматы: «Мектеп» баспасы» ЖАҚ, 2002 жыл. – 456 бет. ISBN 5-7667-8284-5
  2. «Қазақстан»: Ұлттық энцклопедия / Бас редактор Ә. Нысанбаев – Алматы «Қазақ энциклопедиясы» Бас редакциясы, 1998 жыл, ISBN 5-89800-123-9, II том