Брауни

Брауни (ағылшынша Chokolate brownie) – қоңыр түсті шоколадты тәтті нан. Ағылшын тілінен аударғанда brаwn «қоңыр» дегенді білдіретін шоколадты бәліштің төртбұрышты бөліктері. Американдық асхананың дәстүрлі тәттісі. Дайындалу жолына байланысты торттың, кекстің, печеньенің консистенциясына ұқсас келеді.

Бұл десерттің тарихы жайлы дерек те бар. Белта Палмер есімді бикеш Palmer House Hotel кондитеріне 1893 жылы Чикагода өтетін бүкіләлемдік көрменің қатысушы ханымдарына арнап, аса көлемді емес, тәтті бәлішке ұқсас, қорапқа салынған, жеуге ыңғайлы десертке тапсырыс береді. Ерекше браунилердің құрамына грек жаңғақтары мен шабдалы шәрбәті қосылған еді. Сол отельде осы тәсілмен бүгінгі күнге дейін дайындайтын көрінеді.

Сонымен брауни – бастауын АҚШ-тан алатын ылғалды шоколадты бәліш. Оны үй жағдайында оп-оңай дайындауға болады.

Брауниді қанық шоколадты дәмі, тығыз созылмалы құрылымы, дайындалуының жеңілдігі үшін жақсы көреді.

Брауни қамырын қасықпен араластырған дұрыс, сонда ғана ойдағыдай болып шығады.

Құрамы

• 250 г қара шоколад
• 150 г сары май
• 150 г қант
• 120 г ұн
• 1 ас қасық какао
• 3 жұмыртқа
• Шым-шым тұз

Дайындалу тәсілі

1. Сары май мен шоколадты су моншасында ерітіп, суыту керек;

2. Жұмыртқа мен қантты араластырып, шоколадты массаға қосады. Бөлек ыдысқа ұн, какао, тұзды салып қояды. Құрғақ масса мен сұйық массаны араластырады;

3. Қамыр астына пергамент төселген төртбұрышты ыдысқа құйылады. Пеште 180 ° 20 минут пісіреді. Брауниді пеште көп ұстамаған дұрыс. Ішінің сәл піспегендей болып тұруы – қалыпты жағдай. Суытып, төртбұрыш етіп бөліп ұсынады.